kashakash se hasti ki daman chhuDaen

kashākash se hastī kī dāman chhuḌā.eñ

chalo nā ajal hī se rishta juḌā.eñ

vo naġhma mirā merī lai meñ sunā.eñ

javānī ko pur-kaif-o-rangīñ banā.eñ

ḳhudārā ye āñkheñ na aañsū bahā.eñ

kisī kī nazar se na mujh ko girā.eñ

safīna Dubonā hai maujoñ kī fitrat

to kyā nāḳhudā kyā muāfiq havā.eñ

tū ḳhuddār ban jā ai shauq-e-nazāra

vo ḳhud baam par aa.eñ tujh ko bulā.eñ

chalo nā kahīñ duur duniyā se chal kar

alag apnī duniyā-e-ulfat banā.eñ

ḳhizāñ-āshnā huuñ maiñ 'afsar' mujhe kyā

bahāreñ gulistāñ meñ aatī haiñ aa.eñ

zamāne kī chāleñ samajhte haiñ 'afsar'

ab aise nahīñ ham ki dhoke meñ aa.eñ

kashakash se hasti ki daman chhuDaen

chalo na ajal hi se rishta juDaen

wo naghma mera meri lai mein sunaen

jawani ko pur-kaif-o-rangin banaen

KHudara ye aankhen na aansu bahaen

kisi ki nazar se na mujh ko giraen

safina Dubona hai maujon ki fitrat

to kya naKHuda kya muafiq hawaen

tu KHuddar ban ja ai shauq-e-nazara

wo KHud baam par aaen tujh ko bulaen

chalo na kahin dur duniya se chal kar

alag apni duniya-e-ulfat banaen

KHizan-ashna hun main 'afsar' mujhe kya

bahaaren gulistan mein aati hain aaen

zamane ki chaalen samajhte hain 'afsar'

ab aise nahin hum ki dhoke mein aaen