kashan kashan liye jata hai ku-e-yar mujhe

kashāñ kashāñ liye jaatā hai kū-e-yār mujhe

maiñ kyā karūñ nahīñ dil par jo iḳhtiyār mujhe

kisī kī madh-bharī āñkhoñ se kyā milī āñkheñ

samajh rahe haiñ mire dost bāda-ḳhvār mujhe

mujhe ḳhabar hai ki ab tujh ko pā nahīñ saktā

to yaad kyuuñ tirī aatī hai baar baar mujhe

tire ḳhayāl meñ ḳhud ko bhulā diyā itnā

na mil sakegī kabhī terī rahguzār mujhe

ajal se pūchh lo aane meñ der kyuuñ kar dī

ki nāgavār hai is vaqt intizār mujhe

na aa.e the to tamannā thī kyuuñ nahīñ aa.e

vo aa.e chhoḌ ga.e kar ke be-qarār mujhe

'hazīñ' tamannā hai ab mujh ko jī se jaane kī

ki jīte-jī to kisī kā milā na pyaar mujhe

kashan kashan liye jata hai ku-e-yar mujhe

main kya karun nahin dil par jo iKHtiyar mujhe

kisi ki madh-bhari aankhon se kya mili aankhen

samajh rahe hain mere dost baada-KHwar mujhe

mujhe KHabar hai ki ab tujh ko pa nahin sakta

to yaad kyun teri aati hai bar bar mujhe

tere KHayal mein KHud ko bhula diya itna

na mil sakegi kabhi teri rahguzar mujhe

ajal se puchh lo aane mein der kyun kar di

ki nagawar hai is waqt intizar mujhe

na aae the to tamanna thi kyun nahin aae

wo aae chhoD gae kar ke be-qarar mujhe

'hazin' tamanna hai ab mujh ko ji se jaane ki

ki jite-ji to kisi ka mila na pyar mujhe