kashkol-e-gadai tha ki rahmat ka subu tha

kashkol-e-gadā.ī thā ki rahmat kā subū thā

dil dil hai hamārī to in āñkhoñ meñ lahū thā

nam honā to āñkhoñ kā bahar-hāl thā 'uqda

ashkoñ ke tarannum se kiyā ham ne vuzū thā

tujh se hī umīdeñ thiiñ juḌīñ dil kī ki āḳhir

mehmāñ the sabhī is ke makīñ ek hī tū thā

kab tan ko mire tū ne kiyā dard se ḳhālī

kab zaḳhm-e-jigar merā kiyā tū ne rafū thā

jo bichhḌā hai ham se to nahīñ ham ko ḳhabar hai

vo dost thā apnā thā parāyā thā 'adū thā

kab chehre pe mere thā koī parda mirī jaañ

jo dil kā tasavvur hai vo āñkhoñ se numū thā

ab duur huā us se to dil kahtā hai ‘kāvish’

vo rang thā raunaq thā koī gul thā ki bū thā

kashkol-e-gadai tha ki rahmat ka subu tha

dil dil hai hamari to in aankhon mein lahu tha

nam hona to aankhon ka bahar-haal tha 'uqda

ashkon ke tarannum se kiya hum ne wuzu tha

tujh se hi umiden thin juDin dil ki ki aaKHir

mehman the sabhi is ke makin ek hi tu tha

kab tan ko mere tu ne kiya dard se KHali

kab zaKHm-e-jigar mera kiya tu ne rafu tha

jo bichhDa hai hum se to nahin hum ko KHabar hai

wo dost tha apna tha paraya tha 'adu tha

kab chehre pe mere tha koi parda meri jaan

jo dil ka tasawwur hai wo aankhon se numu tha

ab dur hua us se to dil kahta hai ‘kawish’

wo rang tha raunaq tha koi gul tha ki bu tha