kasrat-e-gham se pareshan hun dil shad nahin

kasrat-e-ġham se pareshān huuñ dil shaad nahīñ

dām-e-ulfat meñ giraftār huuñ āzād nahīñ

pūchhte mujh se ho kyā merī musībat ai ḳhizr

rāh-e-gum-gashta huuñ manzil kā pata yaad nahīñ

ka.aba-o-dair-o-kalīsā meñ hai jalva us kā

kaun sā ghar hai jo is nuur se ābād nahīñ

dil-e-be-tāb ho rāzī-ba-razā-e-mahbūb

sheva-e-ahl-e-vafā nāla-o-fariyād nahīñ

daad bedād taġhāful sar-e-mahshar tauba

ye to manzūr hameñ ai sitam-ījād nahīñ

bijliyāñ aur bhī kauñdīñ sar-e-mahshar dil par

ham asīrān-e-mohabbat kahīñ āzād nahīñ

yuuñ sar-e-hashr 'samar' ko na girā nazroñ se

chaar hī din meñ tujhe ahd-e-vafā yaad nahīñ

kasrat-e-gham se pareshan hun dil shad nahin

dam-e-ulfat mein giraftar hun aazad nahin

puchhte mujh se ho kya meri musibat ai KHizr

rah-e-gum-gashta hun manzil ka pata yaad nahin

kaba-o-dair-o-kalisa mein hai jalwa us ka

kaun sa ghar hai jo is nur se aabaad nahin

dil-e-be-tab ho raazi-ba-raza-e-mahbub

shewa-e-ahl-e-wafa nala-o-fariyaad nahin

dad bedad taghaful sar-e-mahshar tauba

ye to manzur hamein ai sitam-ijad nahin

bijliyan aur bhi kaundin sar-e-mahshar dil par

hum asiran-e-mohabbat kahin aazad nahin

yun sar-e-hashr 'samar' ko na gira nazron se

chaar hi din mein tujhe ahd-e-wafa yaad nahin