kaTne ko umr kaT gai puchho na kya mila

kaTne ko 'umr kaT ga.ī pūchho na kyā milā

apnī ḳhabar na mujh ko na apnā patā milā

gandum kī fasl ho nahīñ saktī javār se

mujh ko bure 'amal kā natīja burā milā

sho'la ho yā hubāb ho yā ho gul-e-chaman

koī na is jahāñ meñ hameñ der-pā milā

ik ham haiñ jin ko zindagī-e-muḳhtasar milī

ik ḳhizr-e-pāk haiñ jinheñ āb-e-baqā milā

achchhā samajh rahā huuñ har ik aadmī ko maiñ

hālāñki jo milā vo bure se burā milā

ġham meñ girā na aañkh se ashkoñ kī qadr kar

miTTī meñ tū na aise dur-e-be-bahā milā

mujh par khulā jo man-‘arafa-nafsahū paḌhā

pahchānā jis ne aap ko us ko ḳhudā milā

tauba huī qubūl ba-vaqt-e-aḳhīr bhī

bāb-e-karam ḳhudā kā hamesha khulā milā

jis ko vafā kā paas ho jis meñ ḳhulūs ho

aisā na koī aadmī is daur kā milā

de sāġhar-e-tahī bhī to kuchh ġham nahīñ mujhe

āñkheñ uThā nazar se nazar sāqiyā milā

ab aarzū rahī na kisī aur chiiz kī

sad-shukr hai ki mujh ko dar-e-mustafā milā

kyā kyā milā na bāb-e-rasūl-e-karīm se

'izzat milī faroġh milā mudda'ā milā

ḳhāqān-e-chīn-o-qaisar-o-kisrā kī kyā bisāt

in se sivā rasūl ke dar kā gadā milā

rif’at meñ martabe meñ buzurgī meñ yā-nabī

bā’d-e-ḳhudā na ham ko koī aap sā milā

mahshar meñ āftāb kī hiddat se bach gayā

dāmān-e-mustafā kā mujhe aasrā milā

duniyā meñ apnī apnī paḌī hai har ek ko

'bartar' na koī banda-e-be-mudda’ā milā

kaTne ko 'umr kaT gai puchho na kya mila

apni KHabar na mujh ko na apna pata mila

gandum ki fasl ho nahin sakti jawar se

mujh ko bure 'amal ka natija bura mila

sho'la ho ya hubab ho ya ho gul-e-chaman

koi na is jahan mein hamein der-pa mila

ek hum hain jin ko zindagi-e-muKHtasar mili

ek KHizr-e-pak hain jinhen aab-e-baqa mila

achchha samajh raha hun har ek aadmi ko main

haalanki jo mila wo bure se bura mila

gham mein gira na aankh se ashkon ki qadr kar

miTTi mein tu na aise dur-e-be-baha mila

mujh par khula jo man-‘arafa-nafsahu paDha

pahchana jis ne aap ko us ko KHuda mila

tauba hui qubul ba-waqt-e-aKHir bhi

bab-e-karam KHuda ka hamesha khula mila

jis ko wafa ka pas ho jis mein KHulus ho

aisa na koi aadmi is daur ka mila

de saghar-e-tahi bhi to kuchh gham nahin mujhe

aankhen uTha nazar se nazar saqiya mila

ab aarzu rahi na kisi aur chiz ki

sad-shukr hai ki mujh ko dar-e-mustafa mila

kya kya mila na bab-e-rasul-e-karim se

'izzat mili farogh mila mudda'a mila

KHaqan-e-chin-o-qaisar-o-kisra ki kya bisat

in se siwa rasul ke dar ka gada mila

rif’at mein martabe mein buzurgi mein ya-nabi

ba’d-e-KHuda na hum ko koi aap sa mila

mahshar mein aaftab ki hiddat se bach gaya

daman-e-mustafa ka mujhe aasra mila

duniya mein apni apni paDi hai har ek ko

'bartar' na koi banda-e-be-mudda’a mila