kaun aa gaya ye hashr ka saman liye hue

kaun aa gayā ye hashr kā sāmāñ liye hue

dāman meñ apne merā garebāñ liye hue

har ek ġham hai 'aish kā 'unvāñ liye hue

shām-e-ḳhizāñ hai sub.h-e-bahārāñ liye hue

sajda hai merā zauq-e-farāvāñ liye hue

uTThegā ab to sar dar-e-jānāñ liye hue

ba.ad-e-rihā.ī bhī na maiñ zindāñ se jā.ūñgā

baiThā rahūñgā izzat-e-zindāñ liye hue

ab bhī na ḳhanda-lab hoñ mire zaḳhm-hā-e-dil

vo muskurā rahe haiñ namak-dāñ liye hue

ai chāra-sāz baiTh ye chāragarī bhī dekh

uTThegā merā dard hī darmāñ liye hue

rangīnī-e-tabassum-e-paiham na pūchhiye

jaise vo aa rahe hoñ gulistāñ liye hue

aisā bhī kaash aa.e mohabbat meñ inqalāb

vo aa.eñ merī diid kā armāñ liye hue

kaisī bahār aa.ī hai ab ke ba-rang-e-nau

har ek gul hai ḳhūn-e-shahīdāñ liye hue

imkān-e-sahv ham se bhī mumkin hai ai 'shifā'

insāniyat kā ham bhī haiñ imkāñ liye hue

kaun aa gaya ye hashr ka saman liye hue

daman mein apne mera gareban liye hue

har ek gham hai 'aish ka 'unwan liye hue

sham-e-KHizan hai subh-e-bahaaran liye hue

sajda hai mera zauq-e-farawan liye hue

uTThega ab to sar dar-e-jaanan liye hue

baad-e-rihai bhi na main zindan se jaunga

baiTha rahunga izzat-e-zindan liye hue

ab bhi na KHanda-lab hon mere zaKHm-ha-e-dil

wo muskura rahe hain namak-dan liye hue

ai chaara-saz baiTh ye chaaragari bhi dekh

uTThega mera dard hi darman liye hue

rangini-e-tabassum-e-paiham na puchhiye

jaise wo aa rahe hon gulistan liye hue

aisa bhi kash aae mohabbat mein inqalab

wo aaen meri did ka arman liye hue

kaisi bahaar aai hai ab ke ba-rang-e-nau

har ek gul hai KHun-e-shahidan liye hue

imkan-e-sahw hum se bhi mumkin hai ai 'shifa'

insaniyat ka hum bhi hain imkan liye hue