kaun aaya gesuon ko pareshan kiye hue

kaun aayā gesuoñ ko pareshāñ kiye hue

bardādī-e-nigāh kā sāmāñ kiye hue

phir chāhtā huuñ ḳhanjar-e-qātil se irtibāt

dushvārī-e-hayāt ko āsāñ kiye hue

phir sāhil-e-murād kī hai dil ko aarzū

kashtī ko nazr-e-shorish-e-tūfāñ kiye hue

phir huuñ tire taġhāful-e-zāhir kā shikva-sanj

jaañ ko fidā-e-pursish-e-pinhāñ kiye hue

phir haiñ harīm-e-nāz se jalvoñ kī bārisheñ

hairānī-e-nigāh kā sāmāñ kiye hue

'maikash' nahīñ mujhe mai-o-mai-ḳhāna kī talāsh

baiThā huuñ chashm-e-yār se paimāñ kiye hue

kaun aaya gesuon ko pareshan kiye hue

bardadi-e-nigah ka saman kiye hue

phir chahta hun KHanjar-e-qatil se irtibaat

dushwari-e-hayat ko aasan kiye hue

phir sahil-e-murad ki hai dil ko aarzu

kashti ko nazr-e-shorish-e-tufan kiye hue

phir hun tere taghaful-e-zahir ka shikwa-sanj

jaan ko fida-e-pursish-e-pinhan kiye hue

phir hain harim-e-naz se jalwon ki barishen

hairani-e-nigah ka saman kiye hue

'maikash' nahin mujhe mai-o-mai-KHana ki talash

baiTha hun chashm-e-yar se paiman kiye hue