kaun ab jae nasheman ko sajaane ke liye

kaun ab jaa.e nasheman ko sajāne ke liye

phir bahār aa.ī hai dīvāna banāne ke liye

barq se itnā hameñ kahnā hai ai ahl-e-jahāñ

kyā hamārā hī nasheman thā jalāne ke liye

maiñ samajhtā thā ki aahoñ meñ asar kuchh bhī nahīñ

lījiye aa hī ga.e ḳhud vo manāne ke liye

ham to samjhe the ki takmīl-e-mohabbat hai yahī

kyā navāzā thā nigāhoñ se girāne ke liye

'ishq meñ dil pe jo guzrī hai na pūchhe vo koī

rah gayā huuñ maiñ faqat aañsū bahāne ke liye

aaj saaqī kī nigāheñ jo uThīñ bahr-e-karam

vo ghaTā uTThī hañsī merī uḌāne ke liye

bā-ḳhabar hote na vo rāz-e-mohabbat se kabhī

ham ko jaanā hī na thā qissa sunāne ke liye

jis ko jiine kā har ik rasta batāyā thā kabhī

muntaḳhab us ne kiyā ham ko nishāne ke liye

shā'irī jin kī nigāhoñ meñ tarannum hai faqat

ab vahī aa.e haiñ 'ishrat' ko paḌhāne ke liye

kaun ab jae nasheman ko sajaane ke liye

phir bahaar aai hai diwana banane ke liye

barq se itna hamein kahna hai ai ahl-e-jahan

kya hamara hi nasheman tha jalane ke liye

main samajhta tha ki aahon mein asar kuchh bhi nahin

lijiye aa hi gae KHud wo manane ke liye

hum to samjhe the ki takmil-e-mohabbat hai yahi

kya nawaza tha nigahon se girane ke liye

'ishq mein dil pe jo guzri hai na puchhe wo koi

rah gaya hun main faqat aansu bahane ke liye

aaj saqi ki nigahen jo uThin bahr-e-karam

wo ghaTa uTThi hansi meri uDane ke liye

ba-KHabar hote na wo raaz-e-mohabbat se kabhi

hum ko jaana hi na tha qissa sunane ke liye

jis ko jine ka har ek rasta bataya tha kabhi

muntaKHab us ne kiya hum ko nishane ke liye

sha'iri jin ki nigahon mein tarannum hai faqat

ab wahi aae hain 'ishrat' ko paDhane ke liye