kaun batlae ki kis ko kya mila

kaun batlā.e ki kis ko kyā milā

jis kī qismat meñ jo likkhā thā milā

tark mai-noshī to maiñ ne kī magar

ye batā zāhid ki tujh ko kyā milā

mar-miTī duniyā ḳhushī ke naam par

ġham na koī chāhne vaalā milā

fikr meñ andāz meñ āvāz meñ

har bashar apnī jagah tanhā milā

ab nahīñ be-laus milne kā rivāj

jo milā vo apne matlab kā milā

simTī simTī har ḳhushī aa.ī nazar

bikhrā bikhrā ġham kā shīrāza milā

bāñkpan shāyad isī kā naam hai

husn rangīnī meñ bhī saada milā

sehn-e-gulshan meñ vo kahlā.e gulāb

ḳhuun jin phūloñ ko shabnam kā milā

apnā maazī yaad aaya hai 'la.īq'

zaḳhm dil ko jab koī taaza milā

kaun batlae ki kis ko kya mila

jis ki qismat mein jo likkha tha mila

tark mai-noshi to main ne ki magar

ye bata zahid ki tujh ko kya mila

mar-miTi duniya KHushi ke nam par

gham na koi chahne wala mila

fikr mein andaz mein aawaz mein

har bashar apni jagah tanha mila

ab nahin be-laus milne ka riwaj

jo mila wo apne matlab ka mila

simTi simTi har KHushi aai nazar

bikhra bikhra gham ka shiraaza mila

bankpan shayad isi ka nam hai

husn rangini mein bhi sada mila

sehn-e-gulshan mein wo kahlae gulab

KHun jin phulon ko shabnam ka mila

apna mazi yaad aaya hai 'laiq'

zaKHm dil ko jab koi taza mila