kaun guzra tha mehrab-e-jaan se abhi KHamushi KHamushi shor bharta hua

kaun guzrā thā mehrāb-e-jāñ se abhī ḳhāmushī ḳhāmushī shor bhartā huā

dhund meñ koī shai juuñ damaktī huī ik badan sā badan se ubhartā huā

sarf kartī huī jaise sā'at koī lamha koī farāmosh kartā huā

phir na jaane kahāñ TuuT kar jā girā ek saaya saroñ se guzartā huā

ek 'umr-e-gurezāñ kī mohlat bahut phailtā hī gayā maiñ ufuq-tā-ufuq

mere bātin ko chhūtī huī vo nigah aur maiñ chāroñ taraf paañv dhartā huā

ye jo uḌtī huī sā.at-e-ḳhvāb hai kitnī mahsūs hai kitnī nāyāb hai

phuul palkoñ se chuntī huī raushnī aur maiñ ḳhushbueñ tahrīr kartā huā

mere bas meñ the saare zamān-o-makāñ lek maiñ dekhtā rah gayā iin o aañ

chal diyā le ke chuTkī meñ koī zamīñ āsmāñ āsmāñ gard kartā huā

apnī maujūdgī se thā maiñ be-ḳhabar dekhtā kyā huuñ aise meñ yak-dam idhar

qat' kartī huī shab ke pahlū meñ ik aadmī TūTtā aur bikhartā huā

kaun guzra tha mehrab-e-jaan se abhi KHamushi KHamushi shor bharta hua

dhund mein koi shai jun damakti hui ek badan sa badan se ubharta hua

sarf karti hui jaise sa'at koi lamha koi faramosh karta hua

phir na jaane kahan TuT kar ja gira ek saya saron se guzarta hua

ek 'umr-e-gurezan ki mohlat bahut phailta hi gaya main ufuq-ta-ufuq

mere baatin ko chhuti hui wo nigah aur main chaaron taraf panw dharta hua

ye jo uDti hui saat-e-KHwab hai kitni mahsus hai kitni nayab hai

phul palkon se chunti hui raushni aur main KHushbuen tahrir karta hua

mere bas mein the sare zaman-o-makan lek main dekhta rah gaya in o aan

chal diya le ke chuTki mein koi zamin aasman aasman gard karta hua

apni maujudgi se tha main be-KHabar dekhta kya hun aise mein yak-dam idhar

qat' karti hui shab ke pahlu mein ek aadmi TuTta aur bikharta hua