kaun hai jo yahan mehman hua chahta hai

kaun hai jo yahāñ mehmān huā chāhtā hai

ḳhāna-e-dil mirā vīrān huā chāhtā hai

rang pe rang badaltī hai ye duniyā kaise

kyā se kyā dard kā 'unvān huā chāhtā hai

un kī hijrat pe faqat ye dil-e-nādāñ hī nahīñ

shahr kā shahr hī sunsān huā chāhtā hai

dekh to ek nazar is ko ye terā bismil

ab tirī raah meñ qurbān huā chāhtā hai

tujh pe 'haidar' ne haiñ is darja raqam kī ġhazleñ

ab to ye sāhib-e-dīvān huā chāhtā hai

mar gayā aaj vo dīvāna sā shā'ir laḌkā

le tire shahr meñ e'lān huā chāhtā hai

aap kā hijr meñ kuchh bhī nahīñ jaanā lekin

merā har pal yahāñ nuqsān huā chāhtā hai

chhoḌ do mujh ko mire haal pe logo jaao

ab mujhe 'ishq kā 'irfān huā chāhtā hai

ik mo'amma hai jo bālā-e-ḳhirad hai 'haidar'

aadmī hazrat-e-insān huā chāhtā hai

kaun hai jo yahan mehman hua chahta hai

KHana-e-dil mera viran hua chahta hai

rang pe rang badalti hai ye duniya kaise

kya se kya dard ka 'unwan hua chahta hai

un ki hijrat pe faqat ye dil-e-nadan hi nahin

shahr ka shahr hi sunsan hua chahta hai

dekh to ek nazar is ko ye tera bismil

ab teri rah mein qurban hua chahta hai

tujh pe 'haidar' ne hain is darja raqam ki ghazlen

ab to ye sahib-e-diwan hua chahta hai

mar gaya aaj wo diwana sa sha'ir laDka

le tere shahr mein e'lan hua chahta hai

aap ka hijr mein kuchh bhi nahin jaana lekin

mera har pal yahan nuqsan hua chahta hai

chhoD do mujh ko mere haal pe logo jao

ab mujhe 'ishq ka 'irfan hua chahta hai

ek mo'amma hai jo baala-e-KHirad hai 'haidar'

aadmi hazrat-e-insan hua chahta hai