kaun jaane hai ye di kis ne dua jine ki

kaun jaane hai ye dī kis ne duā jiine kī

maiñ ne har saañs meñ paa.ī hai sazā jiine kī

dil ke TukḌe jo liye phirtā huuñ qarya qarya

ba-ḳhudā kaisī huī mujh se ḳhatā jiine kī

ik to is shahr kā har shaḳhs huā hai dushman

us pe bhārī hai ye mujh par bhī qazā jiine kī

zindagī vaise bhī rūThī sī chalī jaatī thī

ab to mohlat bhī nahīñ jān-e-vafā jiine kī

sāqiyā dil mirā lagtā nahīñ mai-ḳhānoñ meñ

mujh ko tadbīr koī aur batā jiine kī

vo haiñ betāb nayā zaḳhm lagāne ke liye

ik ghaḌī aur mujhe de de ḳhudā jiine kī

ai dil-e-ḳhasta tujhe le ke kahāñ jaa.eñ ham

zahr-e-ġham ko bhī vo kahte haiñ davā jiine kī

dil se utre hue bekār haiñ ham bhī 'barham'

raas aatī nahīñ ham ko bhī fazā jiine kī

kaun jaane hai ye di kis ne dua jine ki

main ne har sans mein pai hai saza jine ki

dil ke TukDe jo liye phirta hun qarya qarya

ba-KHuda kaisi hui mujh se KHata jine ki

ek to is shahr ka har shaKHs hua hai dushman

us pe bhaari hai ye mujh par bhi qaza jine ki

zindagi waise bhi ruThi si chali jati thi

ab to mohlat bhi nahin jaan-e-wafa jine ki

saqiya dil mera lagta nahin mai-KHanon mein

mujh ko tadbir koi aur bata jine ki

wo hain betab naya zaKHm lagane ke liye

ek ghaDi aur mujhe de de KHuda jine ki

ai dil-e-KHasta tujhe le ke kahan jaen hum

zahr-e-gham ko bhi wo kahte hain dawa jine ki

dil se utre hue bekar hain hum bhi 'barham'

ras aati nahin hum ko bhi faza jine ki