kaun kah sakta hai ab un ko KHata ke dhabbe

kaun kah saktā hai ab un ko ḳhatā ke dhabbe

ujlī poshāk meñ phirte haiñ nahā ke dhabbe

ab bhī kartā huuñ vo maḳhmal sī hathelī mahsūs

ab bhī maujūd haiñ dāman pe hinā ke dhabbe

ġham ke sahrā se nikal aa.e the shāyad kuchh log

kitne chehroñ pe nazar aa.e havā ke dhabbe

is tarah log to pahchān liye jaate kuchh

kaash māthoñ pe ubhar aa.eñ daġhā ke dhabbe

rog baaqī na rahā mar ga.e rogī bhī sab

rah ga.e aaj bhī dāman pe davā ke dhabbe

is liye apnī ḳhatā dekh na paa.e tum bhī

dil ke shīshe pe the 'afroz' anā ke dhabbe

kaun kah sakta hai ab un ko KHata ke dhabbe

ujli poshak mein phirte hain naha ke dhabbe

ab bhi karta hun wo maKHmal si hatheli mahsus

ab bhi maujud hain daman pe hina ke dhabbe

gham ke sahra se nikal aae the shayad kuchh log

kitne chehron pe nazar aae hawa ke dhabbe

is tarah log to pahchan liye jate kuchh

kash mathon pe ubhar aaen dagha ke dhabbe

rog baqi na raha mar gae rogi bhi sab

rah gae aaj bhi daman pe dawa ke dhabbe

is liye apni KHata dekh na pae tum bhi

dil ke shishe pe the 'afroz' ana ke dhabbe