kaun kahta hai ki benam-o-nishan ho jaunga

kaun kahtā hai ki benām-o-nishāñ ho jā.ūñgā

Duub kar maiñ qatre qatre se ayaañ ho jā.ūñgā

dekhnā chheḌūñgā maqtal meñ bhī sāz-e-sarmadī

ishq par jab zulm hogā naġhma-ḳhvāñ ho jā.ūñgā

motī ban kar sīpiyoñ meñ aap raushan haiñ agar

maiñ bhī giilī ret par gauhar-e-fishāñ ho jā.ūñgā

saarī duniyā se judā hai merī fitrat kā mizāj

jis qadar simTūñgā utnā be-karāñ ho jā.ūñgā

mere hote zindagī be-rang ho saktī nahīñ

nabz-e-ālam meñ lahū ban kar ravāñ ho jā.ūñgā

jab muarriḳh merī hastī par uThā.egā qalam

intihā ye hai ki terī dāstāñ ho jā.ūñgā

hasratoñ kī manzileñ ro.eñgī mere haal par

aise āvāra musāfir kā nishāñ ho jā.ūñgā

ye bahut dushvār hai lekin tumhāre vāste

maiñ tumhāre aur apne darmiyāñ ho jā.ūñgā

chahchahā.ūñgā bahāroñ meñ parindoñ kī tarah

pattharoñ kī vādiyoñ meñ be-zabāñ ho jā.ūñgā

gulsitāñ faanī sahī tum ho magar ḳhushbū kā ḳhvāb

maiñ tumhārā giit ban kar jāvedāñ ho jā.ūñgā

jab samundar mere siine meñ samā jā.egā 'prem'

har bhañvar kī aabrū kā imtihāñ ho jā.ūñgā

kaun kahta hai ki benam-o-nishan ho jaunga

Dub kar main qatre qatre se ayan ho jaunga

dekhna chheDunga maqtal mein bhi saz-e-sarmadi

ishq par jab zulm hoga naghma-KHwan ho jaunga

moti ban kar sipiyon mein aap raushan hain agar

main bhi gili ret par gauhar-e-fishan ho jaunga

sari duniya se juda hai meri fitrat ka mizaj

jis qadar simTunga utna be-karan ho jaunga

mere hote zindagi be-rang ho sakti nahin

nabz-e-alam mein lahu ban kar rawan ho jaunga

jab muarriKH meri hasti par uThaega qalam

intiha ye hai ki teri dastan ho jaunga

hasraton ki manzilen roengi mere haal par

aise aawara musafir ka nishan ho jaunga

ye bahut dushwar hai lekin tumhaare waste

main tumhaare aur apne darmiyan ho jaunga

chahchahaunga bahaaron mein parindon ki tarah

pattharon ki wadiyon mein be-zaban ho jaunga

gulsitan fani sahi tum ho magar KHushbu ka KHwab

main tumhaara git ban kar jawedan ho jaunga

jab samundar mere sine mein sama jaega 'prem'

har bhanwar ki aabru ka imtihan ho jaunga