kaun kahta hai ki is bazm se sarkar gae

kaun kahtā hai ki is bazm se sarkār ga.e

ab to sarkār hī sarkār haiñ aġhyār ga.e

āfat-e-jāñ koī be-parda-e-āb-o-gil hai

marne vaale na mare aah hameñ maar ga.e

vo jinheñ hosh ho jāneñ vahī ānā-jānā

ham to hushiyār na aa.e the na hushiyār ga.e

aap kī bazm meñ dekhā ye nirālā dastūr

laa.e pindār vo lekar vahī pindār ga.e

ab na ham apne na duniyā kī koī shai apnī

ek hī daav meñ jo kuchh thā vo sab haar ga.e

kyā ḳhabar hai kisī āsūda-e-sāhil ko 'zahīn'

un meñ ham Duub ga.e duur ga.e haar ga.e

kaun kahta hai ki is bazm se sarkar gae

ab to sarkar hi sarkar hain aghyar gae

aafat-e-jaan koi be-parda-e-ab-o-gil hai

marne wale na mare aah hamein mar gae

wo jinhen hosh ho jaanen wahi aana-jaana

hum to hushiyar na aae the na hushiyar gae

aap ki bazm mein dekha ye nirala dastur

lae pindar wo lekar wahi pindar gae

ab na hum apne na duniya ki koi shai apni

ek hi daw mein jo kuchh tha wo sab haar gae

kya KHabar hai kisi aasuda-e-sahil ko 'zahin'

un mein hum Dub gae dur gae haar gae