kaun kahta hai sar-e-arsh-e-barin rahta hai

kaun kahtā hai sar-e-arsh-e-barīñ rahtā hai

vo to ik dard hai jo dil ke qarīñ rahtā hai

chāñd par apne qadam aap ne kyuuñ rok liye

ek gaam aur ki sūraj bhī yahīñ rahtā hai

sham.a kī tarah pighaltā huuñ maiñ lamha lamha

mere ehsās meñ ik sho.ala-jabīñ rahtā hai

dil ke darvāze pe ab kis ko sadā dete ho

muddateñ guzrīñ yahāñ koī nahīñ rahtā hai

vo jo sūraj ko hathelī pe liye phirtā thā

unhīñ tārīk sī galiyoñ meñ kahīñ rahtā hai

jin fazāoñ meñ tamannāoñ kā dam ghaTtā hai

haañ mire daur kā fankār vahīñ rahtā hai

jaane ye shauq kī hai kaun sī manzil 'ḳhusrav'

maiñ kahīñ rahtā huuñ dil merā kahīñ rahtā hai

kaun kahta hai sar-e-arsh-e-barin rahta hai

wo to ek dard hai jo dil ke qarin rahta hai

chand par apne qadam aap ne kyun rok liye

ek gam aur ki suraj bhi yahin rahta hai

shama ki tarah pighalta hun main lamha lamha

mere ehsas mein ek shoala-jabin rahta hai

dil ke darwaze pe ab kis ko sada dete ho

muddaten guzrin yahan koi nahin rahta hai

wo jo suraj ko hatheli pe liye phirta tha

unhin tarik si galiyon mein kahin rahta hai

jin fazaon mein tamannaon ka dam ghaTta hai

han mere daur ka fankar wahin rahta hai

jaane ye shauq ki hai kaun si manzil 'KHusraw'

main kahin rahta hun dil mera kahin rahta hai