kaun karta sar-e-darbar himayat meri

kaun kartā sar-e-darbār himāyat merī

taḳhta-e-dār pe khīñchī ga.ī jur.at merī

ghar paḌosī ke mire aaj bhī chūlhā na jalā

masjidoñ meñ rahī mahdūd ibādat merī

merā qātil mirā sar le ke bhī shādāñ na huā

sar nahīñ us ko to maqsūd thī bai'at merī

mere TuuTe hue par dekh ke hañsne vaalo

maiñ uḌūñgā abhī TuuTī nahīñ himmat merī

ek se chehre yahāñ ek sī āvāzeñ haiñ

aisī bastī meñ hai pahchān salāmat merī

maiñ ne gahrā.iyāñ naapī haiñ samundar kī miyāñ

tum ne be-mol ḳharīdī hai mahārat merī

vaz.a-dārī to mire ḳhuun meñ shāmil hai 'zamīr'

ab zamīneñ haiñ na jāgīr na daulat merī

kaun karta sar-e-darbar himayat meri

taKHta-e-dar pe khinchi gai jurat meri

ghar paDosi ke mere aaj bhi chulha na jala

masjidon mein rahi mahdud ibaadat meri

mera qatil mera sar le ke bhi shadan na hua

sar nahin us ko to maqsud thi bai'at meri

mere TuTe hue par dekh ke hansne walo

main uDunga abhi TuTi nahin himmat meri

ek se chehre yahan ek si aawazen hain

aisi basti mein hai pahchan salamat meri

main ne gahraiyan napi hain samundar ki miyan

tum ne be-mol KHaridi hai mahaarat meri

waza-dari to mere KHun mein shamil hai 'zamir'

ab zaminen hain na jagir na daulat meri