kaun se the wo tumhaare ahd jo TuTe na the

kaun se the vo tumhāre ahd jo TuuTe na the

ḳhair in bātoñ meñ kyā rakkhā hai tum jhūTe na the

bāġhbāñ kuchh soch kar ham qaid se chhūTe na the

varna kuchh paañv na the be-kār par TuuTe na the

ḳhaar jab ahl-e-junūñ ke paañv meñ TuuTe na the

dāman-e-sahrā pe ye rañgīn gul-būTe na the

rah ga.ī mahrūm āzādī ke naġhmoñ se bahār

kyā kareñ qaid-e-zabāñ-bandī se ham chhūTe na the

is javānī se to achchhī thī tumhārī kam-sinī

bhuul to jaate the va.adoñ ko magar jhūTe na the

us zamāne se duā kī hai bahāroñ ke liye

jab faqat zikr-e-chaman-bandī thā gul-būTe na the

kyā ye sach hai ai mire sayyād gulshan luT gayā

jab to mere sāmne do phuul bhī TuuTe na the

chhoḌ to dete the raste meñ zarā sī baat par

rahbaroñ ne manziloñ par qāfile luuTe na the

kis qadar aañsū bahā.e tum ne shām-e-ġham 'qamar'

itne taare to falak se bhī kabhī TuuTe na the

kaun se the wo tumhaare ahd jo TuTe na the

KHair in baaton mein kya rakkha hai tum jhuTe na the

baghban kuchh soch kar hum qaid se chhuTe na the

warna kuchh panw na the be-kar par TuTe na the

KHar jab ahl-e-junun ke panw mein TuTe na the

daman-e-sahra pe ye rangin gul-buTe na the

rah gai mahrum aazadi ke naghmon se bahaar

kya karen qaid-e-zaban-bandi se hum chhuTe na the

is jawani se to achchhi thi tumhaari kam-sini

bhul to jate the wadon ko magar jhuTe na the

us zamane se dua ki hai bahaaron ke liye

jab faqat zikr-e-chaman-bandi tha gul-buTe na the

kya ye sach hai ai mere sayyaad gulshan luT gaya

jab to mere samne do phul bhi TuTe na the

chhoD to dete the raste mein zara si baat par

rahbaron ne manzilon par qafile luTe na the

kis qadar aansu bahae tum ne sham-e-gham 'qamar'

itne tare to falak se bhi kabhi TuTe na the