kaun tha wo hamein pata hi nahin

kaun thā vo hameñ patā hī nahīñ

us ne ham se gila kyā hī nahīñ

raushnī dekhnā hai chhū kar ke

āñkhoñ pe kuchh yaqīñ rahā hī nahīñ

zindagī se javāb kyā māñgeñ

zindagī ko to kuchh patā hī nahīñ

chāhe dīvār ho yā dil koī

ham se to kuchh bhī TūTtā hī nahīñ

baaġh meñ phir bahār lauTī hai

aur bhañvaroñ ko kuchh patā hī nahīñ

mere zaḳhmoñ kī baat kartā hai

par vo zaḳhmoñ ko dekhtā hī nahīñ

aur bhī aib haiñ bhare us meñ

ek vo sirf bevafā hī nahīñ

jhiil kī minnateñ karegā hī

chāñd ke paas ā.īna hī nahīñ

achchhā hotā jo ḳhud pe hañs letā

kyūñki rone se kuchh huā hī nahīñ

kaun tha wo hamein pata hi nahin

us ne hum se gila kya hi nahin

raushni dekhna hai chhu kar ke

aankhon pe kuchh yaqin raha hi nahin

zindagi se jawab kya mangen

zindagi ko to kuchh pata hi nahin

chahe diwar ho ya dil koi

hum se to kuchh bhi TuTta hi nahin

bagh mein phir bahaar lauTi hai

aur bhanwaron ko kuchh pata hi nahin

mere zaKHmon ki baat karta hai

par wo zaKHmon ko dekhta hi nahin

aur bhi aib hain bhare us mein

ek wo sirf bewafa hi nahin

jhil ki minnaten karega hi

chand ke pas aaina hi nahin

achchha hota jo KHud pe hans leta

kyunki rone se kuchh hua hi nahin