kaunsi shab dil tumhaare waste taDpa nahin

kaunsī shab dil tumhāre vāste taḌpā nahīñ

is bharī bastī meñ koī tum sā be-parvā nahīñ

vā.e-qismat lag gayā hai jī ik aise shahr meñ

jis kī galiyoñ meñ ba-juz apne koī apnā nahīñ

ye galī-kūche haiñ jis kūche kī nisbat se 'azīz

ik usī kūche kī jānib kyoñ qadam uThtā nahīñ

kaunsī shāḳh-e-mizha ab ke nahīñ phūlī-phalī

ab ke dasht-e-dil pe abr-e-ġham kahāñ barsā nahīñ

chaudhvīñ kā chāñd shab ham ko to pāgal kar gayā

dekh kar us ko samay yaad aa.e haiñ kyā kyā nahīñ

montgomery kī mahaktī shaam kyā kahnā tirā

tere sāyoñ meñ ġham-e-dil hai ġham-e-duniyā nahīñ

tā-kanār-e-chashm koī mauj aane do 'bashīr'

dil kā dariyā dekh lenā be-guhar dariyā nahīñ

kaunsi shab dil tumhaare waste taDpa nahin

is bhari basti mein koi tum sa be-parwa nahin

wae-qismat lag gaya hai ji ek aise shahr mein

jis ki galiyon mein ba-juz apne koi apna nahin

ye gali-kuche hain jis kuche ki nisbat se 'aziz

ek usi kuche ki jaanib kyon qadam uThta nahin

kaunsi shaKH-e-mizha ab ke nahin phuli-phali

ab ke dasht-e-dil pe abr-e-gham kahan barsa nahin

chaudhwin ka chand shab hum ko to pagal kar gaya

dekh kar us ko samay yaad aae hain kya kya nahin

montgomery ki mahakti sham kya kahna tera

tere sayon mein gham-e-dil hai gham-e-duniya nahin

ta-kanar-e-chashm koi mauj aane do 'bashir'

dil ka dariya dekh lena be-guhar dariya nahin