KHak-e-irfan mayassar ho KHata se pahle

ḳhāk-e-irfān mayassar ho ḳhatā se pahle

ham bhī din raat ulajhte the ḳhudā se pahle

aaj duniyā mire ahbāb ko pursa degī

mar chukā maiñ to ka.ī baar qazā se pahle

sach kā ban-bās uThānā to panapnā Thahrā

zahr piinā bhī zarūrī hai baqā se pahle

aap kyā aa ga.e sahrā kā muqaddar jaagā

pyaas par aag barastī thī ghaTā se pahle

vo sazā thī ki añdherā thā mirī āñkhoñ meñ

maiñ ne kyoñ soch ke dekhā thā ḳhudā se pahle

vaqt alfāz kā mafhūm badal detā hai

ham bidakte the kahāñ harf-e-vafā se pahle

vo patang uḌne uḌāne kā maza kyā jaane

jo na uljhī ho kabhī shoḳh havā se pahle

KHak-e-irfan mayassar ho KHata se pahle

hum bhi din raat ulajhte the KHuda se pahle

aaj duniya mere ahbab ko pursa degi

mar chuka main to kai bar qaza se pahle

sach ka ban-bas uThana to panapna Thahra

zahr pina bhi zaruri hai baqa se pahle

aap kya aa gae sahra ka muqaddar jaga

pyas par aag barasti thi ghaTa se pahle

wo saza thi ki andhera tha meri aankhon mein

main ne kyon soch ke dekha tha KHuda se pahle

waqt alfaz ka mafhum badal deta hai

hum bidakte the kahan harf-e-wafa se pahle

wo patang uDne uDane ka maza kya jaane

jo na uljhi ho kabhi shoKH hawa se pahle