KHak ho kar bhi kab miTunga main

ḳhaak ho kar bhī kab miTūñgā maiñ

phuul ban kar yahīñ khilūñgā maiñ

tujh ko āvāz bhī maiñ kyuuñ dūñgā

terā rasta bhī kyuuñ takūñgā maiñ

ik purāne se zaḳhm par ab ke

koī marham nayā rakhūñgā maiñ

gher leñgī ye titliyāñ mujh ko

ḳhushbueñ jiyūñ rihā karūñgā maiñ

ḳhud se bāhar to kam nikaltā huuñ

jī meñ aayā to phir milūñgā maiñ

varna jiinā muhāl kar degā

dard ko ab ġhazal karūñgā maiñ

dhukdhukī sī lagī hai kyuuñ jī ko

itnī jaldī kahāñ marūñgā maiñ

sāñseñ detī rahīñ jo chingārī

ek jangal sā jal uThūñgā maiñ

thak gayā huuñ maiñ is jazīre par

phir samundar kā ruḳh karūñgā maiñ

ruuh kā ye libās badlūñgā

bhes duujā koī dharūñgā maiñ

KHak ho kar bhi kab miTunga main

phul ban kar yahin khilunga main

tujh ko aawaz bhi main kyun dunga

tera rasta bhi kyun takunga main

ek purane se zaKHm par ab ke

koi marham naya rakhunga main

gher lengi ye titliyan mujh ko

KHushbuen jiyun riha karunga main

KHud se bahar to kam nikalta hun

ji mein aaya to phir milunga main

warna jina muhaal kar dega

dard ko ab ghazal karunga main

dhukdhuki si lagi hai kyun ji ko

itni jaldi kahan marunga main

sansen deti rahin jo chingari

ek jangal sa jal uThunga main

thak gaya hun main is jazire par

phir samundar ka ruKH karunga main

ruh ka ye libas badlunga

bhes duja koi dharunga main