KHak uDti rahi jalte hue parwanon ki

ḳhaak uḌtī rahī jalte hue parvānoñ kī

sham.a ne qadr na kī soḳhta-sāmānoñ kī

is qadar bhiiḌ hai is daur meñ dīvānoñ kī

vus.ateñ kam huī jaatī haiñ bayābānoñ kī

phuul gulshan meñ bhalā ḳhaak khilā.egī bahār

dhajjiyāñ us ko mileñgī jo garebānoñ kī

manzil-e-dār se aage bhī ga.e haiñ aksar

himmateñ tum ne baḌhā.ī haiñ jo dīvānoñ kī

mehr-o-māh ġhuncha-o-gul bhī haiñ bahut ḳhuub magar

un se rangīn hai surḳhī mire afsānoñ kī

dast-e-taḳhrīb se ta.amīr kā miltā hai pata

naaz kartī hai ḳhirad aql pe dīvānoñ kī

jur.ateñ ḳhuub baḌhā.ī haiñ safīne vaalo

nā-ḳhudāoñ ne ubharte hue tūfānoñ kī

ham tak ai dast-e-junūñ izn-e-bahār aa.e to

ḳhair dāman kī rahegī na garebānoñ kī

jab mo.arriḳh koī tārīḳh-e-chaman likkhegā

dāstāñ barq kahegī mire afsānoñ kī

azmat-e-ka.aba samajhtā hai zamāna jis ko

ek rangīn sī tasvīr hai but-ḳhānoñ kī

ai 'vakīl' ubhregā jab zauq-e-rihā.ī kā junūñ

baat rah jā.egī zindāñ meñ nigahbānoñ kī

KHak uDti rahi jalte hue parwanon ki

shama ne qadr na ki soKHta-samanon ki

is qadar bhiD hai is daur mein diwanon ki

wusaten kam hui jati hain bayabanon ki

phul gulshan mein bhala KHak khilaegi bahaar

dhajjiyan us ko milengi jo garebanon ki

manzil-e-dar se aage bhi gae hain aksar

himmaten tum ne baDhai hain jo diwanon ki

mehr-o-mah ghuncha-o-gul bhi hain bahut KHub magar

un se rangin hai surKHi mere afsanon ki

dast-e-taKHrib se tamir ka milta hai pata

naz karti hai KHirad aql pe diwanon ki

juraten KHub baDhai hain safine walo

na-KHudaon ne ubharte hue tufanon ki

hum tak ai dast-e-junun izn-e-bahaar aae to

KHair daman ki rahegi na garebanon ki

jab moarriKH koi tariKH-e-chaman likkhega

dastan barq kahegi mere afsanon ki

azmat-e-kaba samajhta hai zamana jis ko

ek rangin si taswir hai but-KHanon ki

ai 'wakil' ubhrega jab zauq-e-rihai ka junun

baat rah jaegi zindan mein nigahbanon ki