KHaksari kijiye ya shahryari kijiye

ḳhāksārī kījiye yā shahryārī kījiye

ham ġharīboñ meñ kuchh apnā faiz jaarī kījiye

jin se kuchh hāsil nahīñ tābīr-ḳhvāhī ke sivā

aise ḳhvāboñ meñ basar kyuuñ raat saarī kījiye

jo hamārā haal hai us se alag un kā nahīñ

sākinān-e-shahr se kyā parda-dārī kījiye

aap jo kahte haiñ vo karte nahīñ mālūm hai

pyaar kar sakte nahīñ bāteñ to pyārī kījiye

aa.eñ bhī tashrīf le aa.eñ yahī dastūr hai

baiTh kar mere sirhāne ġham-gusārī kījiye

chuum kar ham chhoḌ deñge ye gumāñ sachchā nahīñ

aap apnī chaah kā patthar na bhārī kījiye

ham yuuñ hī mar jā.eñge kaafī hai ishāra aap kā

aañkh ko ḳhanjar na abrū ko kaTārī kījiye

kusht-gān-e-ḳhanjar taslīm kahlāte haiñ kyuuñ

kuchh taḌap dikhlā.iye kuchh be-qarārī kījiye

ham bure haiñ yā bhale mahsūs ḳhud ko bhī na ho

thoḌī apne aap se bhī hoshyārī kījiye

sarkashān-e-ishq phir āmāda-e-fariyād haiñ

phir koī farmān-e-qatl-e-ām jaarī kījiye

KHaksari kijiye ya shahryari kijiye

hum gharibon mein kuchh apna faiz jari kijiye

jin se kuchh hasil nahin tabir-KHwahi ke siwa

aise KHwabon mein basar kyun raat sari kijiye

jo hamara haal hai us se alag un ka nahin

sakinan-e-shahr se kya parda-dari kijiye

aap jo kahte hain wo karte nahin malum hai

pyar kar sakte nahin baaten to pyari kijiye

aaen bhi tashrif le aaen yahi dastur hai

baiTh kar mere sirhane gham-gusari kijiye

chum kar hum chhoD denge ye guman sachcha nahin

aap apni chah ka patthar na bhaari kijiye

hum yun hi mar jaenge kafi hai ishaara aap ka

aankh ko KHanjar na abru ko kaTari kijiye

kusht-gan-e-KHanjar taslim kahlate hain kyun

kuchh taDap dikhlaiye kuchh be-qarari kijiye

hum bure hain ya bhale mahsus KHud ko bhi na ho

thoDi apne aap se bhi hoshyari kijiye

sarkashan-e-ishq phir aamada-e-fariyaad hain

phir koi farman-e-qatl-e-am jari kijiye