Khaali-uz-zehn hue jab se KHalaon ki tarah

ḳhālī-uz-zehn hue jab se ḳhalāoñ kī tarah

ham bhaTakte rahe be-lāg havāoñ kī tarah

ḳhud-kushī jurm hai sangīn ḳhatāoñ kī tarah

zindagī dekh idhar ham meñ ḳhudāoñ kī tarah

kitnā āsān hai ehsās kī talḳhī kā 'ilāj

zahr biktā hai sar-e-ām davāoñ kī tarah

kyā muqaddar hai ki sūraj ke nagar meñ rah kar

chāñd se log haiñ tārīk guphāoñ kī tarah

haa.e is daur kī taqdīr meñ āvāz-e-azāñ

kārgar kyoñ nahīñ meloñ kī sadāoñ kī tarah

us ke jalte hue hoñToñ pe mirā naam 'ājiz'

aaj bhī aatā hai majbūr du'āoñ kī tarah

KHali-uz-zehn hue jab se KHalaon ki tarah

hum bhaTakte rahe be-lag hawaon ki tarah

KHud-kushi jurm hai sangin KHataon ki tarah

zindagi dekh idhar hum mein KHudaon ki tarah

kitna aasan hai ehsas ki talKHi ka 'ilaj

zahr bikta hai sar-e-am dawaon ki tarah

kya muqaddar hai ki suraj ke nagar mein rah kar

chand se log hain tarik guphaon ki tarah

hae is daur ki taqdir mein aawaz-e-azan

kargar kyon nahin melon ki sadaon ki tarah

us ke jalte hue honTon pe mera nam 'ajiz'

aaj bhi aata hai majbur du'aon ki tarah