KHamoshiyon ke gahre samundar mein Dub jaen

ḳhāmoshiyoñ ke gahre samundar meñ Duub jaa.eñ

kho jaa.eñ is tarah ki phir apnā pata na paa.eñ

hai maut kā payām kināroñ kī zindagī

ma.asūm machhliyoñ se kaho jaal meñ na aa.eñ

dasht-e-alam meñ barg-e-ḳhizāñ-dīda kī tarah

bas ai hujūm-e-shauq kahīñ ham bikhar na jaa.eñ

vīrāniyāñ ki āñkhoñ meñ sahrā basā huā

majbūri-e-hayāt na aañsū bhī muskurā.eñ

chehre jhulas rahe haiñ havādis kī dhuup meñ

phir bhī alam-nasīb hazāroñ meñ jagmagā.eñ

aisā na ho ki dil kā har ik zaḳhm aañch de

kah dījiye 'shamīm' vo merī ġhazal na gaa.eñ

KHamoshiyon ke gahre samundar mein Dub jaen

kho jaen is tarah ki phir apna pata na paen

hai maut ka payam kinaron ki zindagi

masum machhliyon se kaho jal mein na aaen

dasht-e-alam mein barg-e-KHizan-dida ki tarah

bas ai hujum-e-shauq kahin hum bikhar na jaen

viraniyan ki aankhon mein sahra basa hua

majburi-e-hayat na aansu bhi muskuraen

chehre jhulas rahe hain hawadis ki dhup mein

phir bhi alam-nasib hazaron mein jagmagaen

aisa na ho ki dil ka har ek zaKHm aanch de

kah dijiye 'shamim' wo meri ghazal na gaen