KHanon mein KHud hi baT ke ab insan rah gaya

ḳhānoñ meñ ḳhud hī baT ke ab insān rah gayā

dekhā jab apnā hashr pareshān rah gayā

purkhoñ kī shāndār havelī kā zikr chhoḌ

ābād kar khañDar ko jo vīrān rah gayā

gard-e-safar meñ phuul se chehre utar ga.e

ā.īna un ko dekh ke hairān rah gayā

dil bhar gayā hai apnā masāfat ke shauq meñ

manzil hai duur rasta bhī sunsān rah gayā

ham jāgte the madd-e-muqābil rahe magar

ḳhāmosh inqalāb thā tūfān rah gayā

kis ne diyā thā sulh-o-safā.ī kā mashvara

bastī meñ ho ke jañg kā elaan rah gayā

qismat kā hai zavāl ki mehnat kī hai kamī

ham ne kiyā jo kaam bhī nuqsān rah gayā

ham ne diyā thā ḳhuun bhī us ke liye magar

vo mar gayā ġharīb kā ehsān rah gayā

'nayyar' ne sādgī se guzārī hai zindagī

makkāriyoñ se apnoñ kī anjān rah gayā

KHanon mein KHud hi baT ke ab insan rah gaya

dekha jab apna hashr pareshan rah gaya

purkhon ki shandar haweli ka zikr chhoD

aabaad kar khanDar ko jo viran rah gaya

gard-e-safar mein phul se chehre utar gae

aaina un ko dekh ke hairan rah gaya

dil bhar gaya hai apna masafat ke shauq mein

manzil hai dur rasta bhi sunsan rah gaya

hum jagte the madd-e-muqabil rahe magar

KHamosh inqalab tha tufan rah gaya

kis ne diya tha sulh-o-safai ka mashwara

basti mein ho ke jang ka elan rah gaya

qismat ka hai zawal ki mehnat ki hai kami

hum ne kiya jo kaam bhi nuqsan rah gaya

hum ne diya tha KHun bhi us ke liye magar

wo mar gaya gharib ka ehsan rah gaya

'nayyar' ne sadgi se guzari hai zindagi

makkariyon se apnon ki anjaan rah gaya