KHanuman-soz ma-siwa hun main

ḳhānumāñ-soz mā-sivā huuñ maiñ

apne saa.e se bhī judā huuñ maiñ

ġhaur har chand kar rahā huuñ maiñ

par ye khultā nahīñ ki kyā huuñ maiñ

nahīñ is rah meñ dūsre kī khapat

aap hī apnā rahnumā huuñ maiñ

vo agar aa mileñ to kyā hai 'ajab

ġham se kuchh aur ho gayā huuñ maiñ

dil hai shauq-e-gunāh se labrez

dekhne hī kā pārsā huuñ maiñ

kyuuñ na ho daar kā vo mustaujib

jo ki banda kahe ḳhudā huuñ maiñ

soz-e-dil kar chukā hai jism ko ḳhaak

ab tirā muntazir sabā huuñ maiñ

har lab-e-zaḳhm-e-tan se maiñ dam-e-qatl

kahtā qātil ko marhabā huuñ maiñ

un sā maġhrūr aur pursish-e-hāl

ḳhvāb hai ye jo dekhtā huuñ maiñ

mujh sā hogā na saḳht-jāñ koī

ki shab-e-hijr meñ jiyā huuñ maiñ

merī pursish jo kī kisī ne to vo

bole haañ sūrat-āshnā huuñ maiñ

shāreh-e-hāl-e-dil samajh mujh ko

dard hī dard ho gayā huuñ maiñ

aañkh tak Dāltā nahīñ gāhak

kuchh 'ajab jins-e-nā-ravā huuñ maiñ

roz-o-shab hai ḳhayāl-e-kākul-o-zulf

kin balāoñ meñ phañs rahā huuñ maiñ

misl-e-nashtar haiñ ḳhār-e-sahrā.ī

aur vahshat barahna-pā huuñ maiñ

kal jo maiñ ne kahā ki o be-mehr

dard-e-furqat se mar rahā huuñ maiñ

hañs ke bole ye sab banāvaT hai

aap ko ḳhuub jāntā huuñ maiñ

dikhne kyā zaḳhm-e-dil lage 'majrūh'

haa.e haa.e jo kar rahā huuñ maiñ

KHanuman-soz ma-siwa hun main

apne sae se bhi juda hun main

ghaur har chand kar raha hun main

par ye khulta nahin ki kya hun main

nahin is rah mein dusre ki khapat

aap hi apna rahnuma hun main

wo agar aa milen to kya hai 'ajab

gham se kuchh aur ho gaya hun main

dil hai shauq-e-gunah se labrez

dekhne hi ka parsa hun main

kyun na ho dar ka wo mustaujib

jo ki banda kahe KHuda hun main

soz-e-dil kar chuka hai jism ko KHak

ab tera muntazir saba hun main

har lab-e-zaKHm-e-tan se main dam-e-qatl

kahta qatil ko marhaba hun main

un sa maghrur aur pursish-e-haal

KHwab hai ye jo dekhta hun main

mujh sa hoga na saKHt-jaan koi

ki shab-e-hijr mein jiya hun main

meri pursish jo ki kisi ne to wo

bole han surat-ashna hun main

shaareh-e-haal-e-dil samajh mujh ko

dard hi dard ho gaya hun main

aankh tak Dalta nahin gahak

kuchh 'ajab jins-e-na-rawa hun main

roz-o-shab hai KHayal-e-kakul-o-zulf

kin balaon mein phans raha hun main

misl-e-nashtar hain KHar-e-sahrai

aur wahshat barahna-pa hun main

kal jo main ne kaha ki o be-mehr

dard-e-furqat se mar raha hun main

hans ke bole ye sab banawaT hai

aap ko KHub jaanta hun main

dikhne kya zaKHm-e-dil lage 'majruh'

hae hae jo kar raha hun main