KHabar bekas ki ranj-o-sadma-o-alam lete hain

ḳhabar bekas kī ranj-o-sadma-o-ālām lete haiñ

musībat meñ yahī ahbāb dāman thaam lete haiñ

shahīdān-e-jafā kī maut par mātam kā kyā mauqa

ye zindān-e-balā se chhuT ke ab ārām lete haiñ

ġhazab kā rūh-afzā diid ke qābil hai vo manzar

tire hāthoñ se saaqī jis ghaḌī ham jaam lete haiñ

abas saudā nahīñ sar meñ hamāre zulf-e-jānāñ kā

dil-e-vahshī kī ḳhātir mol ham ye daam lete haiñ

nigāh-e-shauq se matlab bayāñ kar dete haiñ apnā

ham in āñkhoñ hī se apne laboñ kā kaam lete haiñ

vafā tere qatīloñ kī hai qātil daad ke qābil

ajal hī kā ḳhudā ke sāmne bas naam lete haiñ

ḳhudā jaane ki ab karte haiñ hangāme bapā kyā kyā

kisī ke haath se jaam aaj dard-āshām lete haiñ

ġhalat hai ye ki un kā dil mubarrā hai ta.assur se

vo sun kar merā afsāna kaleja thaam lete haiñ

mirā maqtūl honā tāziyāna hai raqīboñ ko

koī ulfat jatātā hai to merā naam lete haiñ

ye hai zauq-e-giraftārī ki chhuT kar qaid se 'bedil'

dil-o-jāñ bech kar sayyād se ham daam lete haiñ

KHabar bekas ki ranj-o-sadma-o-alam lete hain

musibat mein yahi ahbab daman tham lete hain

shahidan-e-jafa ki maut par matam ka kya mauqa

ye zindan-e-bala se chhuT ke ab aaram lete hain

ghazab ka ruh-afza did ke qabil hai wo manzar

tere hathon se saqi jis ghaDi hum jam lete hain

abas sauda nahin sar mein hamare zulf-e-jaanan ka

dil-e-wahshi ki KHatir mol hum ye dam lete hain

nigah-e-shauq se matlab bayan kar dete hain apna

hum in aankhon hi se apne labon ka kaam lete hain

wafa tere qatilon ki hai qatil dad ke qabil

ajal hi ka KHuda ke samne bas nam lete hain

KHuda jaane ki ab karte hain hangame bapa kya kya

kisi ke hath se jam aaj dard-asham lete hain

ghalat hai ye ki un ka dil mubarra hai tassur se

wo sun kar mera afsana kaleja tham lete hain

mera maqtul hona taziyana hai raqibon ko

koi ulfat jatata hai to mera nam lete hain

ye hai zauq-e-giraftari ki chhuT kar qaid se 'bedil'

dil-o-jaan bech kar sayyaad se hum dam lete hain