KHabar bhi hai mohabbat ke parastaron pe kya guzri

ḳhabar bhī hai mohabbat ke parastāroñ pe kyā guzrī

koī hai pochhne vaalā ki bīmāroñ pe kyā guzrī

ayādat se vo jab palTeñ to un se pūchh le koī

vo kah deñge ba-ḳhūbī dil ke bīmāroñ pe kyā guzrī

dil-e-yūsuf se kyā pūchhe zuleḳhā se zarā koī

ḳharīdāroñ pe kyā guzrī hai bāzāroñ pe kyā guzrī

samajh hī meñ nahīñ aatā ki hai ye rāz-e-ulfat kyā

bache kyūñkar ḳhalīlullāh añgāroñ pe kyā guzrī

na pūchho jalva-farmā jab hue vo nāz-o-shoḳhī se

huā kyā haal dīvānoñ kā hushyāroñ pe kyā guzrī

tum uTh kar kyā ga.e mahfil se ik mahshar huā barpā

tumheñ ma.alūm hī kyā hai parastāroñ pe kyā guzrī

huā shāgird jab maiñ hazrat-e-'mahvī' kā ai 'nāzī'

tujhe kuchh ilm hai sun kar ḳhabar yāroñ pe kyā guzrī

KHabar bhi hai mohabbat ke parastaron pe kya guzri

koi hai pochhne wala ki bimaron pe kya guzri

ayaadat se wo jab palTen to un se puchh le koi

wo kah denge ba-KHubi dil ke bimaron pe kya guzri

dil-e-yusuf se kya puchhe zuleKHa se zara koi

KHaridaron pe kya guzri hai bazaron pe kya guzri

samajh hi mein nahin aata ki hai ye raaz-e-ulfat kya

bache kyunkar KHalilullah angaron pe kya guzri

na puchho jalwa-farma jab hue wo naz-o-shoKHi se

hua kya haal diwanon ka hushyaron pe kya guzri

tum uTh kar kya gae mahfil se ek mahshar hua barpa

tumhein malum hi kya hai parastaron pe kya guzri

hua shagird jab main hazrat-e-'mahwi' ka ai 'nazi'

tujhe kuchh ilm hai sun kar KHabar yaron pe kya guzri