KHabar kahan thi mujhe pahle is KHazane ki

ḳhabar kahāñ thī mujhe pahle is ḳhazāne kī

ġhamoñ ne raah dikhā.ī sharāb-ḳhāne kī

charāġh-e-dil ne kī hasrat jo muskurāne kī

to khilkhilā ke hañsīñ āñdhiyāñ zamāne kī

maiñ shā.irī kā hunar jāntā nahīñ be-shak

ajiib dhun hai mujhe qāfiya milāne kī

vajūd apnā miTāyā kisī kī chāhat meñ

bas itnī rām-kahānī hai is dīvāne kī

vo ghoñsla bhī banā legā ba.ad meñ apnā

abhī hai fikr parinde ko āb-o-dāne kī

maiñ ashk ban ke girā huuñ ḳhud apnī nazroñ se

kahāñ milegī jagah mujh ko sar chhupāne kī

anāth bachchoñ kī aaheñ savāl kartī haiñ

ḳhudā ko kyā thī zarūrat jahāñ banāne kī

KHabar kahan thi mujhe pahle is KHazane ki

ghamon ne rah dikhai sharab-KHane ki

charagh-e-dil ne ki hasrat jo muskurane ki

to khilkhila ke hansin aandhiyan zamane ki

main shairi ka hunar jaanta nahin be-shak

ajib dhun hai mujhe qafiya milane ki

wajud apna miTaya kisi ki chahat mein

bas itni ram-kahani hai is diwane ki

wo ghonsla bhi bana lega baad mein apna

abhi hai fikr parinde ko aab-o-dane ki

main ashk ban ke gira hun KHud apni nazron se

kahan milegi jagah mujh ko sar chhupane ki

anath bachchon ki aahen sawal karti hain

KHuda ko kya thi zarurat jahan banane ki