KHabar kuchh nahin mujhko mera anjam kya hoga

ḳhabar kuchh nahīñ mujh ko mirā anjām kyā hogā

vahī hogā jo hāthoñ kī lakīroñ meñ likhā hogā

tamāshā jo dikhānā thā vahī sab ko dikhā aa.e

nahīñ is se ġharaz koī kisī ne kyā kahā hogā

ik aisā vaqt bhī aa.egā is daur-e-ta'alluq meñ

hamāre aur us ke darmiyāñ ik fāsla hogā

abhī se dhuup kī shiddat se ḳhā.if haiñ jahāñ vaale

savā-neze pe jis din aa gayā sūraj to kyā hogā

suno ab harf-gīrī kā nahīñ hai fā.eda kuchh bhī

ki jo tum ne kahā hogā vahī ham ne sunā hogā

KHabar kuchh nahin mujh ko mera anjam kya hoga

wahi hoga jo hathon ki lakiron mein likha hoga

tamasha jo dikhana tha wahi sab ko dikha aae

nahin is se gharaz koi kisi ne kya kaha hoga

ek aisa waqt bhi aaega is daur-e-ta'alluq mein

hamare aur us ke darmiyan ek fasla hoga

abhi se dhup ki shiddat se KHaif hain jahan wale

sawa-neze pe jis din aa gaya suraj to kya hoga

suno ab harf-giri ka nahin hai faeda kuchh bhi

ki jo tum ne kaha hoga wahi hum ne suna hoga