khaDe hain der se ahbab dekhne ke liye

khaḌe haiñ der se ahbāb dekhne ke liye

mirā safīna tah-e-āb dekhne ke liye

khulī jo aañkh to ham Dūbte nazar aa.e

ga.e the duur se girdāb dekhne ke liye

abas pareshāñ haiñ ta.abīr kī tag-o-dau meñ

milī hai niiñd hameñ ḳhvāb dekhne ke liye

taras rahī hai mire dasht kī fazā kab se

kisī daraḳht ko shādāb dekhne ke liye

uḌaan bharne lage haiñ tuyūr-o-tayyāre

qarīb-o-dūr se sailāb dekhne ke liye

sunā hai maiñ ne havā.eñ bhī be-qarār haiñ ab

mire diye ko zafar-yāb dekhne ke liye

nazar jhukā.e khaḌī haiñ aqīdateñ 'ālam'

shikast-e-gumbad-o-mehrāb dekhne ke liye

khaDe hain der se ahbab dekhne ke liye

mera safina tah-e-ab dekhne ke liye

khuli jo aankh to hum Dubte nazar aae

gae the dur se girdab dekhne ke liye

abas pareshan hain tabir ki tag-o-dau mein

mili hai nind hamein KHwab dekhne ke liye

taras rahi hai mere dasht ki faza kab se

kisi daraKHt ko shadab dekhne ke liye

uDan bharne lage hain tuyur-o-tayyare

qarib-o-dur se sailab dekhne ke liye

suna hai main ne hawaen bhi be-qarar hain ab

mere diye ko zafar-yab dekhne ke liye

nazar jhukae khaDi hain aqidaten 'alam'

shikast-e-gumbad-o-mehrab dekhne ke liye