khaDe hain samne ahbab ajgaron ki tarah

khaḌe haiñ sāmne ahbāb ajgaroñ kī tarah

bulā rahā hai bayābāñ khule daroñ kī tarah

subuk-ḳhirām tanāzur muqaddaroñ kī tarah

farāz-e-vaqt pe kyā hai kaTe saroñ kī tarah

vo shaḳhs itnā hī pyāsā bhī hogā andar se

hilore le to rahā hai samundaroñ kī tarah

ḳhalā meñ Duub na jā.ūñ kahīñ mahak ban kar

mujhe sameT lo āñkhoñ meñ manzaroñ kī tarah

shikast-e-ḳhvāb kī āvāz-e-bāzgasht huuñ maiñ

mujhe sañbhal ke baratnā muhāvaroñ kī tarah

na jaane kaun hai ḳhāliq in ābgīnoñ kā

ḳhayāl zehn meñ aate haiñ paikaroñ kī tarah

ab aur hī koī duniyā mujhe 'atā farmā

bisāt-e-dasht bhī mahdūd hai gharoñ kī tarah

amaañ milegī mujhe bahr-o-bar meñ jaane kahāñ

girā huuñ TuuT ke uḌte hue paroñ kī tarah

jhiñjhoḌ mat mujhe aise meñ karb-e-nīm-shabī

navā-e-'mīr' bhī chubhtī hai nashtaroñ kī tarah

kamāl-e-‘asr hai be-chehragī magar 'hairat'

suḳhanvaroñ se to miliye suḳhanvaroñ kī tarah

khaDe hain samne ahbab ajgaron ki tarah

bula raha hai bayaban khule daron ki tarah

subuk-KHiram tanazur muqaddaron ki tarah

faraaz-e-waqt pe kya hai kaTe saron ki tarah

wo shaKHs itna hi pyasa bhi hoga andar se

hilore le to raha hai samundaron ki tarah

KHala mein Dub na jaun kahin mahak ban kar

mujhe sameT lo aankhon mein manzaron ki tarah

shikast-e-KHwab ki aawaz-e-bazgasht hun main

mujhe sanbhal ke baratna muhawaron ki tarah

na jaane kaun hai KHaliq in aabginon ka

KHayal zehn mein aate hain paikaron ki tarah

ab aur hi koi duniya mujhe 'ata farma

bisat-e-dasht bhi mahdud hai gharon ki tarah

aman milegi mujhe bahr-o-bar mein jaane kahan

gira hun TuT ke uDte hue paron ki tarah

jhinjhoD mat mujhe aise mein karb-e-nim-shabi

nawa-e-'mir' bhi chubhti hai nashtaron ki tarah

kamal-e-‘asr hai be-chehragi magar 'hairat'

suKHanwaron se to miliye suKHanwaron ki tarah