KHafa se lag rahe ho kuchh hua kya

ḳhafā se lag rahe ho kuchh huā kyā

tumheñ bhī hai kisī se kuchh gila kyā

jhukī nazreñ ab uThtī hī nahīñ haiñ

koī unvān dil meñ hai chhupā kyā

nigāh-e-ḳhishmagīñ lab pe tabassum

niyāz-o-nāz kā hai silsila kyā

nigāhoñ kā ye shā.ista takallum

ḳhamoshī ko milī tarz-e-adā kyā

usī kā zikr hai sab kī zabāñ par

vo aisā ho gayā hai dilrubā kyā

ba-juz terī talab ke is jahāñ meñ

hamārī aarzū kyā mudda.ā kyā

jidhar dekho vahī jalva-numā hai

yahī shāyad hai irfān-e-ḳhudā kyā

umañDte hī chale aate haiñ aañsū

kisī ne pursish-e-ġham kar diyā kyā

dam-e-ruḳhsat hai aao paas baiTho

duā.eñ do hameñ tum ab davā kyā

'tarab' sāhab kahāñ bazm-e-suḳhan meñ

ġhazal kahnā tumheñ bhī aa gayā kyā

KHafa se lag rahe ho kuchh hua kya

tumhein bhi hai kisi se kuchh gila kya

jhuki nazren ab uThti hi nahin hain

koi unwan dil mein hai chhupa kya

nigah-e-KHishmagin lab pe tabassum

niyaz-o-naz ka hai silsila kya

nigahon ka ye shaista takallum

KHamoshi ko mili tarz-e-ada kya

usi ka zikr hai sab ki zaban par

wo aisa ho gaya hai dilruba kya

ba-juz teri talab ke is jahan mein

hamari aarzu kya muddaa kya

jidhar dekho wahi jalwa-numa hai

yahi shayad hai irfan-e-KHuda kya

umanDte hi chale aate hain aansu

kisi ne pursish-e-gham kar diya kya

dam-e-ruKHsat hai aao pas baiTho

duaen do hamein tum ab dawa kya

'tarab' sahab kahan bazm-e-suKHan mein

ghazal kahna tumhein bhi aa gaya kya