KHafi lafzon se likkhi dard ki tahrir hoti hai

ḳhafī lafzoñ se likkhī dard kī tahrīr hotī hai

ye aurat har tarah se mard kī jāgīr hotī hai

vo jis kī aañkh meñ mahrūmiyāñ bastī haiñ sadiyoñ se

vo ḳhud kitne hī rishtoñ kī magar zanjīr hotī hai

jakaḌ rakkhā hai jis ke dil ko an-dekhe azāboñ ne

vo har ik ḳhvāb kī kaisī hasīñ ta.abīr hotī hai

junūn-e-ishq kī sarhad pe jaañ se jo guzar jaa.e

vahī sassī vahī sohnī vahī to hiir hotī hai

nikal kar ḳhuld se bhī to zamīñ koī nahīñ us kī

zamīñ-zādī kī bhī dekho ajab taqdīr hotī hai

na ho jab chāñd āñchal meñ na sūraj dil kī bastī kā

tan-e-murda sañbhāle vo baḌī dil-gīr hotī hai

jo din bhar jang laḌtī hai masā.ib aur masā.il se

'shafaq' phir shaam ko hai rang sī tasvīr hotī hai

KHafi lafzon se likkhi dard ki tahrir hoti hai

ye aurat har tarah se mard ki jagir hoti hai

wo jis ki aankh mein mahrumiyan basti hain sadiyon se

wo KHud kitne hi rishton ki magar zanjir hoti hai

jakaD rakkha hai jis ke dil ko an-dekhe azabon ne

wo har ek KHwab ki kaisi hasin tabir hoti hai

junun-e-ishq ki sarhad pe jaan se jo guzar jae

wahi sassi wahi sohni wahi to hir hoti hai

nikal kar KHuld se bhi to zamin koi nahin us ki

zamin-zadi ki bhi dekho ajab taqdir hoti hai

na ho jab chand aanchal mein na suraj dil ki basti ka

tan-e-murda sanbhaale wo baDi dil-gir hoti hai

jo din bhar jang laDti hai masaib aur masail se

'shafaq' phir sham ko hai rang si taswir hoti hai