KHair-andesh bane haq ki mazammat na kare

ḳhair-andesh bane haq kī mazammat na kare

ḳhuun apnā hai to apnoñ se baġhāvat na kare

resham-o-atlas-o-kam-ḳhvāb meñ palne vaalā

ham faqīroñ se ulajhne kī himāqat na kare

bevafā.ī kā agar husn kī khul jaa.e bharam

koī bhūle se bhī iqrār-e-mohabbat na kare

aise aa.iin ko Thukrā ke chalā jā.ūñgā

be-navāoñ kī jo pur-zor himāyat na kare

pas isī shakl meñ donoñ kī guzar saktī hai

maiñ bhī shikva na karūñ tū bhī shikāyat na kare

mujh ko tanhā.ī ke zindāñ meñ muqayyad kar do

jab talak aap kā ehsās malāmat na kare

nāḳhudā soch zarā Duub ke gahrā.ī meñ

buġhz kī lahr uThe aur sharārat na kare

rishta-e-mehr-o-vafā aur bhī mazbūt karo

taaki insāñ kisī insān se nafrat na kare

yuuñ na khelo mire jazbāt se tum shām-o-sahar

maiñ huuñ dīvāna mujhe koī nasīhat na kare

sabz gumbad kī ghanī chhāñv jo ho jaa.e nasīb

'muftī'-e-shahr kabhī ḳhvāhish-e-jannat na kare

KHair-andesh bane haq ki mazammat na kare

KHun apna hai to apnon se baghawat na kare

resham-o-atlas-o-kam-KHwab mein palne wala

hum faqiron se ulajhne ki himaqat na kare

bewafai ka agar husn ki khul jae bharam

koi bhule se bhi iqrar-e-mohabbat na kare

aise aain ko Thukra ke chala jaunga

be-nawaon ki jo pur-zor himayat na kare

pas isi shakl mein donon ki guzar sakti hai

main bhi shikwa na karun tu bhi shikayat na kare

mujh ko tanhai ke zindan mein muqayyad kar do

jab talak aap ka ehsas malamat na kare

naKHuda soch zara Dub ke gahrai mein

bughz ki lahr uThe aur shararat na kare

rishta-e-mehr-o-wafa aur bhi mazbut karo

taki insan kisi insan se nafrat na kare

yun na khelo mere jazbaat se tum sham-o-sahar

main hun diwana mujhe koi nasihat na kare

sabz gumbad ki ghani chhanw jo ho jae nasib

'mufti'-e-shahr kabhi KHwahish-e-jannat na kare