KHair guzri teri nazar na hui

ḳhair guzrī tirī nazar na huī

merī duniyā tah-o-zabar na huī

raah takte tamām 'umr kaTī

shām-e-ġham kī abhī sahar na huī

mujh ko taḌpā ke ḳhud taḌapte ho

bekalī merī be-asar na huī

hañste hañste hī pī liye maiñ ne

aañkh ashk-e-alam se tar na huī

kaise sāmān-e-‘aish jam' kiye

maut sar par thī ye ḳhabar na huī

laakh chāhā ki zarb-e-ġham se bachūñ

koī tadbīr kārgar na huī

mausam-e-gul to bārhā aayā

shāḳh-e-dil merī bārvar na huī

ḳhauf thā qabr kā qayāmat kā

dil ko taskīn 'umr-bhar na huī

lag ga.ī 'umr-e-ḳhizr kyā us ko

kyoñ shab-e-hijr muḳhtasar na huī

vo maze kyā haiñ jo idhar na uḌe

vo ḳhalish kyā hai jo udhar na huī

is qarīne se de diyā tū ne

lene vaale ko kuchh ḳhabar na huī

hai ḳhatā dil ko Thes pahuñchānī

ye ḳhatā mujh se bhuul kar na huī

maiñ ne dekhe ‘uyūb auroñ ke

hāl-e-ḳhud par mirī nazar na huī

āzmā.ish qadam qadam par thī

'ishq kī raah be-ḳhatar na huī

ḳhuub the she'r to satā.ish kī

mujh se nā-qadarī-e-hunar na huī

kyā ga.e saath āftāb gayā

vo na aa.e abhī sahar na huī

jis tarah kāTnī thī ai 'bartar'

us tarah zindagī basar na huī

KHair guzri teri nazar na hui

meri duniya tah-o-zabar na hui

rah takte tamam 'umr kaTi

sham-e-gham ki abhi sahar na hui

mujh ko taDpa ke KHud taDapte ho

bekali meri be-asar na hui

hanste hanste hi pi liye main ne

aankh ashk-e-alam se tar na hui

kaise saman-e-‘aish jam' kiye

maut sar par thi ye KHabar na hui

lakh chaha ki zarb-e-gham se bachun

koi tadbir kargar na hui

mausam-e-gul to barha aaya

shaKH-e-dil meri barwar na hui

KHauf tha qabr ka qayamat ka

dil ko taskin 'umr-bhar na hui

lag gai 'umr-e-KHizr kya us ko

kyon shab-e-hijr muKHtasar na hui

wo maze kya hain jo idhar na uDe

wo KHalish kya hai jo udhar na hui

is qarine se de diya tu ne

lene wale ko kuchh KHabar na hui

hai KHata dil ko Thes pahunchani

ye KHata mujh se bhul kar na hui

main ne dekhe ‘uyub auron ke

haal-e-KHud par meri nazar na hui

aazmaish qadam qadam par thi

'ishq ki rah be-KHatar na hui

KHub the she'r to sataish ki

mujh se na-qadari-e-hunar na hui

kya gae sath aaftab gaya

wo na aae abhi sahar na hui

jis tarah kaTni thi ai 'bartar'

us tarah zindagi basar na hui