KHair mangi jo aashiyane ki

ḳhair māñgī jo āshiyāne kī

āñdhiyāñ hañs paḌīñ zamāne kī

mere ġham ko samajh sakā na koī

mujh ko aadat hai muskurāne kī

dil sā ghar Dhā diyā to kis muñh se

baat karte ho ghar basāne kī

husn kī baat ishq ke qisse

baat karte ho kis zamāne kī

dil hī qaabū meñ ab nahīñ merā

ye qayāmat tirī adā ne kī

kuchh to tūfāñ kī zad meñ ham aa.e

kuchh navāzish bhī nā-ḳhudā ne kī

mujh ko tum yaad aur bhī aa.e

koshisheñ jitnī kī bhulāne kī

vo hī 'naushād' fan kā shaidā.ī

baat karte ho kis divāne kī

KHair mangi jo aashiyane ki

aandhiyan hans paDin zamane ki

mere gham ko samajh saka na koi

mujh ko aadat hai muskurane ki

dil sa ghar Dha diya to kis munh se

baat karte ho ghar basane ki

husn ki baat ishq ke qisse

baat karte ho kis zamane ki

dil hi qabu mein ab nahin mera

ye qayamat teri ada ne ki

kuchh to tufan ki zad mein hum aae

kuchh nawazish bhi na-KHuda ne ki

mujh ko tum yaad aur bhi aae

koshishen jitni ki bhulane ki

wo hi 'naushad' fan ka shaidai

baat karte ho kis diwane ki