KHair us se na sahi KHud se wafa kar Dalo

ḳhair us se na sahī ḳhud se vafā kar Daalo

vaqt ab kam hai bahut yād-e-ḳhudā kar Daalo

ek sūrat hai yahī paañv jame rahne kī

haath uThāo dil-e-sābit kī duā kar Daalo

harf-e-inkār bhī us dar se baḌī ne.amat hai

ye faqīroñ ke haiñ asrār sadā kar Daalo

aur duniyā meñ bahut kuchh hai gulistāñ kī tarah

sair tum bhī kabhī ham-rāh-e-sabā kar Daalo

habs hotā hai ajab dil meñ tire ġham ke baġhair

jī ulajhtā hai kuchh is tarah ki kyā kar Daalo

umr bhar aa.egī hāthoñ se gulāboñ kī mahak

ḳhār-zāroñ kā safar barhana-pā kar Daalo

ye malāmat na suno dil kī shab-o-roz 'suhail'

jaan hī kā to ziyāñ hogā vafā kar Daalo

KHair us se na sahi KHud se wafa kar Dalo

waqt ab kam hai bahut yaad-e-KHuda kar Dalo

ek surat hai yahi panw jame rahne ki

hath uThao dil-e-sabit ki dua kar Dalo

harf-e-inkar bhi us dar se baDi neamat hai

ye faqiron ke hain asrar sada kar Dalo

aur duniya mein bahut kuchh hai gulistan ki tarah

sair tum bhi kabhi ham-rah-e-saba kar Dalo

habs hota hai ajab dil mein tere gham ke baghair

ji ulajhta hai kuchh is tarah ki kya kar Dalo

umr bhar aaegi hathon se gulabon ki mahak

KHar-zaron ka safar barhana-pa kar Dalo

ye malamat na suno dil ki shab-o-roz 'suhail'

jaan hi ka to ziyan hoga wafa kar Dalo