KHala ki manzil-e-payab ka pata bhi main

ḳhalā kī manzil-e-pāyāb kā patā bhī maiñ

aur apne aap meñ ik be-karāñ ḳhalā bhī maiñ

fazā ke siine meñ betāb shorisheñ mujh se

dil-e-vajūd kī ik āh-e-nā-rasā bhī maiñ

maiñ apnī shāḳh-e-ḳhamīda kā barg-e-shorīda

shajar kā jism bhī maiñ jism se judā bhī maiñ

tire vajūd ke idrāk tak pahuñchtī huī

yaqīñ kī guuñj bhī maiñ vahm kī havā bhī maiñ

mujhī se fikr-o-nazar ke sanam-kade raushan

aur apne aap ko ab tak na pā sakā bhī maiñ

jamāl-e-sub.h-e-sukūñ shām-e-iztirāb kā rañg

sukūt-e-zard bhī maiñ surḳhī-e-sadā bhī maiñ

varā-e-fahm hai mere tazād kā aalam

ki nok-e-ḳhār bhī maiñ aur barahna-pā bhī maiñ

mire sitam kī ḳharāsheñ mire hī chehre par

avadh kī shaam bhī maiñ aur hiroshima bhī maiñ

mire junūñ ke karishme mirī riyā ke tilism

ki vietnam bhī maiñ aur geneva bhī maiñ

ba-qaul-e-shā.ir-e-mashriq maiñ apnā qātil-e-jāñ

havā-e-tund bhī maiñ barg-e-be-navā bhī maiñ

zavāl-e-ādam-e-ḳhākī kī ibtidā mujh se

aur us kī azmat-e-paiham kā irtiqā bhī maiñ

mujhī ko chhū na sakī 'darwin' kī hadd-e-gumāñ

aur aaj ḳhalvat-e-mahtāb tak rasā bhī maiñ

mujhe to jaise vo an-dekhā rāstā na lagā

ḳhalā ke jāda-e-mānūs par chalā bhī maiñ

fanā kī mauj mirī ruuh ke makāñ se ḳhajil

asīr-e-vaqt bhī maiñ vaqt se varā bhī maiñ

hisār-e-jism ke dīvār-o-bām meñ mahbūs

hudūn-e-kaun-o-makāñ se guzar gayā bhī maiñ

gadā-e-nutq bhī maiñ ḳhāliq-e-azal ke huzūr

aur apne dard kī āvāz kā ḳhudā bhī maiñ

mire sharāra-e-fan se hai raushnī har sū

aur apne sho.ala-e-ehsās meñ jalā bhī maiñ

zabān-e-harf kī sehr-āfrīniyāñ mujh se

lab-e-ḳhayāl kī taqrīr-e-be-sadā bhī maiñ

maiñ us kī soch kā ik shāhkār bhī 'ḳhāvar'

aur us ke shauq kā dilchasp hadisā bhī maiñ

KHala ki manzil-e-payab ka pata bhi main

aur apne aap mein ek be-karan KHala bhi main

faza ke sine mein betab shorishen mujh se

dil-e-wajud ki ek aah-e-na-rasa bhi main

main apni shaKH-e-KHamida ka barg-e-shorida

shajar ka jism bhi main jism se juda bhi main

tere wajud ke idrak tak pahunchti hui

yaqin ki gunj bhi main wahm ki hawa bhi main

mujhi se fikr-o-nazar ke sanam-kade raushan

aur apne aap ko ab tak na pa saka bhi main

jamal-e-subh-e-sukun sham-e-iztirab ka rang

sukut-e-zard bhi main surKHi-e-sada bhi main

wara-e-fahm hai mere tazad ka aalam

ki nok-e-KHar bhi main aur barahna-pa bhi main

mere sitam ki KHarashen mere hi chehre par

awadh ki sham bhi main aur hiroshima bhi main

mere junun ke karishme meri riya ke tilism

ki wietnam bhi main aur genewa bhi main

ba-qaul-e-shair-e-mashriq main apna qatil-e-jaan

hawa-e-tund bhi main barg-e-be-nawa bhi main

zawal-e-adam-e-KHaki ki ibtida mujh se

aur us ki azmat-e-paiham ka irtiqa bhi main

mujhi ko chhu na saki 'darwin' ki hadd-e-guman

aur aaj KHalwat-e-mahtab tak rasa bhi main

mujhe to jaise wo an-dekha rasta na laga

KHala ke jada-e-manus par chala bhi main

fana ki mauj meri ruh ke makan se KHajil

asir-e-waqt bhi main waqt se wara bhi main

hisar-e-jism ke diwar-o-baam mein mahbus

hudun-e-kaun-o-makan se guzar gaya bhi main

gada-e-nutq bhi main KHaliq-e-azal ke huzur

aur apne dard ki aawaz ka KHuda bhi main

mere sharara-e-fan se hai raushni har su

aur apne shoala-e-ehsas mein jala bhi main

zaban-e-harf ki sehr-afriniyan mujh se

lab-e-KHayal ki taqrir-e-be-sada bhi main

main us ki soch ka ek shahkar bhi 'KHawar'

aur us ke shauq ka dilchasp hadisa bhi main