KHala mein pesh-rafti ki taraf pahla ishaara hai

ḳhalā meñ pesh-raftī kī taraf pahlā ishāra hai

kiran kā daaġh ham ne apne dāman par utārā hai

ruḳh-e-‘ālam ko pesh-o-pas na kar deñ ye junūñ-pesha

ḳhudā ne aadmī ko vaqfe vaqfe se pukārā hai

jahān-e-hairat-o-daryāft ham hī se to raushan hai

ye sayyāroñ pe naqsh-e-ābla-pā.ī hamārā hai

ye raftār-e-numū-yābī kā dhīmā-pan ġhanīmat hai

taraqqī kā na honā bhī taraqqī kā ishāra hai

jo uslūb-e-suḳhan ke naam par be-kār jaate haiñ

unhī ke naam par shahr-e-suḳhan meñ ik idāra hai

vujūd-e-sifr se taqvīm-e-do-'ālam nahīñ bantī

hudūd-e-raushnī ke paar bhī raushan sitārā hai

latāfat kā ye pahlū shā'irī kā husn hai 'tauhīd'

garebān-e-jahān-e-ḳhushk-o-tar bhī isti'āra hai

KHala mein pesh-rafti ki taraf pahla ishaara hai

kiran ka dagh hum ne apne daman par utara hai

ruKH-e-‘alam ko pesh-o-pas na kar den ye junun-pesha

KHuda ne aadmi ko waqfe waqfe se pukara hai

jahan-e-hairat-o-daryaft hum hi se to raushan hai

ye sayyaron pe naqsh-e-abla-pai hamara hai

ye raftar-e-numu-yabi ka dhima-pan ghanimat hai

taraqqi ka na hona bhi taraqqi ka ishaara hai

jo uslub-e-suKHan ke nam par be-kar jate hain

unhi ke nam par shahr-e-suKHan mein ek idara hai

wujud-e-sifr se taqwim-e-do-'alam nahin banti

hudud-e-raushni ke par bhi raushan sitara hai

latafat ka ye pahlu sha'iri ka husn hai 'tauhid'

gareban-e-jahan-e-KHushk-o-tar bhi isti'ara hai