KHala mein tair raha hai sawal duniya ka

ḳhalā meñ tair rahā hai savāl duniyā kā

ḳhudā ko aa.egā kis din ḳhayāl duniyā kā

ye aur baat ki jannat yaqīñ se aage thī

vahāñ bhī saath gayā ehtimāl duniyā kā

hamāre nāma-e-a.amāl meñ likhā us ne

urūj-e-ādam-e-ḳhākī zavāl duniyā kā

ye vāqi.a hai ki insān mar gayā pahle

phir is ke ba.ad huā intiqāl duniyā kā

koī ḳhabar nahīñ kis vaqt aur kahāñ gir jaa.e

ḳhudā ke haath se jām-e-sifāl duniyā kā

hazār mail ko dhoyā hazār sābun se

kisī tarah bhī na chhūTā ḳhayāl duniyā kā

ajiib rañg kā piñjra hai āsmāñ nīche

tilism-e-ġhaib hai 'ḳhurshīd' haal duniyā kā

KHala mein tair raha hai sawal duniya ka

KHuda ko aaega kis din KHayal duniya ka

ye aur baat ki jannat yaqin se aage thi

wahan bhi sath gaya ehtimal duniya ka

hamare nama-e-amal mein likha us ne

uruj-e-adam-e-KHaki zawal duniya ka

ye waqia hai ki insan mar gaya pahle

phir is ke baad hua intiqal duniya ka

koi KHabar nahin kis waqt aur kahan gir jae

KHuda ke hath se jam-e-sifal duniya ka

hazar mail ko dhoya hazar sabun se

kisi tarah bhi na chhuTa KHayal duniya ka

ajib rang ka pinjra hai aasman niche

tilism-e-ghaib hai 'KHurshid' haal duniya ka