KHala mein uD rahi hai gard ghar se

ḳhalā meñ uḌ rahī hai gard ghar se

abhī lauTā huuñ maiñ vāpas safar se

kareñ kyā baat ham us chārāgar se

jo vāqif hī nahīñ hai dard-e-sar se

nazar ā.eñge ham bhī 'mīr' sāhib

koī dekhe to 'ġhālib' kī nazar se

mirā aivān hai gosha-nashīnī

huī muddat nahīñ niklā huuñ ghar se

use bhī pī ga.iiñ sūraj kī kirneñ

zarā sā saaya māñgā thā sahar se

falak pairoñ ko bosa de rahā hai

kuchh is andāz se niklā huuñ ghar se

har ik zarra hai ḳhushbū meñ nahāyā

koī guzrā hai shāyad phir idhar se

'ajab ye falsafa hai zindagī kā

charāġh-e-dil huā raushan nazar se

kahāñ se ye kahāñ 'mast' aa gayā huuñ

numūd-e-shām zāhir hai sahar se

KHala mein uD rahi hai gard ghar se

abhi lauTa hun main wapas safar se

karen kya baat hum us chaaragar se

jo waqif hi nahin hai dard-e-sar se

nazar aaenge hum bhi 'mir' sahib

koi dekhe to 'ghaalib' ki nazar se

mera aiwan hai gosha-nashini

hui muddat nahin nikla hun ghar se

use bhi pi gain suraj ki kirnen

zara sa saya manga tha sahar se

falak pairon ko bosa de raha hai

kuchh is andaz se nikla hun ghar se

har ek zarra hai KHushbu mein nahaya

koi guzra hai shayad phir idhar se

'ajab ye falsafa hai zindagi ka

charagh-e-dil hua raushan nazar se

kahan se ye kahan 'mast' aa gaya hun

numud-e-sham zahir hai sahar se