KHalish dil ki rafiq-e-sham-e-tanhai bhi hoti hai

ḳhalish dil kī rafīq-e-shām-e-tanhā.ī bhī hotī hai

magar jab had se baḌh jaatī hai rusvā.ī bhī hotī hai

farāham jin se sāmān-e-jarāhat hote rahte haiñ

unhī nazroñ meñ dar-parda masīhā.ī bhī hotī hai

nazar mahsūs kar saktī nahīñ jis kī latāfat ko

kisī kī mast āñkhoñ meñ vo ra.anā.ī bhī hotī hai

yahī duniyā jo hañstī hai mire hāl-e-pareshāñ par

yahī duniyā kabhī merī tamannā.ī bhī hotī hai

adā-e-pursish-e-ahvāl par kahnā mirā āḳhir

jafā dil par ba-andāz-e-shakebā.ī bhī hotī hai

faqat nādāniyoñ par aa.e kyoñ ilzām-e-barbādī

kahīñ vaj.h-e-tabāhī sirf dānā.ī bhī hotī hai

mohabbat kā vo aalam bhī qayāmat-ḳhez hai 'zaidī'

gavārā jis kī ḳhātir dil ko rusvā.ī bhī hotī hai

KHalish dil ki rafiq-e-sham-e-tanhai bhi hoti hai

magar jab had se baDh jati hai ruswai bhi hoti hai

faraham jin se saman-e-jarahat hote rahte hain

unhi nazron mein dar-parda masihai bhi hoti hai

nazar mahsus kar sakti nahin jis ki latafat ko

kisi ki mast aankhon mein wo ranai bhi hoti hai

yahi duniya jo hansti hai mere haal-e-pareshan par

yahi duniya kabhi meri tamannai bhi hoti hai

ada-e-pursish-e-ahwal par kahna mera aaKHir

jafa dil par ba-andaz-e-shakebai bhi hoti hai

faqat nadaniyon par aae kyon ilzam-e-barbaadi

kahin wajh-e-tabahi sirf danai bhi hoti hai

mohabbat ka wo aalam bhi qayamat-KHez hai 'zaidi'

gawara jis ki KHatir dil ko ruswai bhi hoti hai