KHalish-e-zaKHm-e-tamanna ka mudawa bhi na tha

ḳhalish-e-zaḳhm-e-tamannā kā mudāvā bhī na thā

maiñ ne vo chāhā jo taqdīr meñ likkhā bhī na thā

itnā yaad aa.egā ik roz ye sochā bhī na thā

haa.e vo shaḳhs ki jis se koī rishta bhī na thā

kyoñ use dekh ke baḌhtī thī mirī tishna-labī

abr-pāra bhī na thā vo koī dariyā bhī na thā

dil vo sahrā ki jahāñ uḌtī thī hālāt kī gard

ġham vo bādal jo kabhī khul ke barastā bhī na thā

tū ne kyoñ jāgte rahne kī sazā dī mujh ko

tere baare meñ koī ḳhvāb to dekhā bhī na thā

ho ga.e log ye kyoñ mere lahū ke pyāse

maiñ ne to aañkh uThā kar use dekhā bhī na thā

kuchh jhijaktī huī nazreñ bhī thiiñ mahv-e-gul-gasht

maiñ chaman-zār-e-tasavvur meñ akelā bhī na thā

ba.az rātoñ meñ ye manzar bhī nazar se guzrā

sham.a bhī jaltī rahī ghar meñ ujālā bhī na thā

kabhī ban jā.egī yuuñ yaad tirī juzv-e-hayāt

maiñ ne is ruḳh se tire baab meñ sochā bhī na thā

āsmāñ aur zamīñ hadd-e-nazar tak the muhīt

ham kahāñ jaate nikal kar koī rasta bhī na thā

kuchh umīdeñ thiiñ umañgeñ thiiñ tamannā.eñ thiiñ

dil tirī raah meñ niklā to akelā bhī na thā

umr bhar karte rahe ghar kī tamanna 'tāhir'

aur taqdīr meñ dīvār kā saaya bhī na thā

KHalish-e-zaKHm-e-tamanna ka mudawa bhi na tha

main ne wo chaha jo taqdir mein likkha bhi na tha

itna yaad aaega ek roz ye socha bhi na tha

hae wo shaKHs ki jis se koi rishta bhi na tha

kyon use dekh ke baDhti thi meri tishna-labi

abr-para bhi na tha wo koi dariya bhi na tha

dil wo sahra ki jahan uDti thi haalat ki gard

gham wo baadal jo kabhi khul ke barasta bhi na tha

tu ne kyon jagte rahne ki saza di mujh ko

tere bare mein koi KHwab to dekha bhi na tha

ho gae log ye kyon mere lahu ke pyase

main ne to aankh uTha kar use dekha bhi na tha

kuchh jhijakti hui nazren bhi thin mahw-e-gul-gasht

main chaman-zar-e-tasawwur mein akela bhi na tha

baz raaton mein ye manzar bhi nazar se guzra

shama bhi jalti rahi ghar mein ujala bhi na tha

kabhi ban jaegi yun yaad teri juzw-e-hayat

main ne is ruKH se tere bab mein socha bhi na tha

aasman aur zamin hadd-e-nazar tak the muhit

hum kahan jate nikal kar koi rasta bhi na tha

kuchh umiden thin umangen thin tamannaen thin

dil teri rah mein nikla to akela bhi na tha

umr bhar karte rahe ghar ki tamanna 'tahir'

aur taqdir mein diwar ka saya bhi na tha