KHalwat mein KHayalon ki ye anjuman-arai

ḳhalvat meñ ḳhayāloñ kī ye anjuman-ārā.ī

ābād hai ab kitnā vīrāna-e-tanhā.ī

aise bhī marāhil kuchh aa.e rah-e-hastī meñ

mahsūs huā manzil ḳhud paas chalī aa.ī

tū sham-e-masarrat hai ġham-ḳhāna-e-imkāñ meñ

dam se tire qaa.em hai har bazm kī ra.anā.ī

hai yaad tirī kyā kyā mā.il-ba-karam mujh par

guzre hue lamhoñ ko jo saath liye aa.ī

pighle hue sone se ubhrīñ ka.ī tasvīreñ

dariyā ke kināroñ par jab dhuup utar aa.ī

is gulshan-e-hastī kā har rañg nirālā hai

jab rone lagī shabnam phūloñ ko hañsī aa.ī

KHalwat mein KHayalon ki ye anjuman-arai

aabaad hai ab kitna virana-e-tanhai

aise bhi marahil kuchh aae rah-e-hasti mein

mahsus hua manzil KHud pas chali aai

tu sham-e-masarrat hai gham-KHana-e-imkan mein

dam se tere qaem hai har bazm ki ranai

hai yaad teri kya kya mail-ba-karam mujh par

guzre hue lamhon ko jo sath liye aai

pighle hue sone se ubhrin kai taswiren

dariya ke kinaron par jab dhup utar aai

is gulshan-e-hasti ka har rang nirala hai

jab rone lagi shabnam phulon ko hansi aai