KHamir mera uTha wafa se

ḳhamīr merā uThā vafā se

vajūd merā faqat hayā se

kuchh aur bojhal huā mirā dil

ghuTī huī dard kī fazā se

baras paḌe hasratoñ ke bādal

nazar pe chhā.ī huī ghaTā se

hai vahshatoñ kā safar musalsal

baḌhā junūñ hijr kī sazā se

hatheliyoñ par na rach sakī vo

jo naam likkhā tirā hinā se

banā ga.ī tum ko aur chanchal

jhukī jo merī nazar hayā se

guloñ pe ik be-ḳhudī sī chhā.ī

chaman meñ bahkī huī sabā se

hai vajd kyuuñ shāḳh-e-gul pe taarī

lipaT ke jhūmī vo kyuuñ havā se

mahak kī kirneñ chaman meñ raqsāñ

gulāb kī reshmī qabā se

kalī ko chūmā guloñ ko nochā

kisī ne sīmāb sī adā se

hai to masīhā to kar mudāvā

hai soch zaḳhmī tirī jafā se

vahī adā be-niyāziyoñ kī

to kaam kab tak na luuñ anā se

yaqīn kaise karūñ maiñ 'bāno'

sukūn kyā de sakeñ dilāse

KHamir mera uTha wafa se

wajud mera faqat haya se

kuchh aur bojhal hua mera dil

ghuTi hui dard ki faza se

baras paDe hasraton ke baadal

nazar pe chhai hui ghaTa se

hai wahshaton ka safar musalsal

baDha junun hijr ki saza se

hatheliyon par na rach saki wo

jo nam likkha tera hina se

bana gai tum ko aur chanchal

jhuki jo meri nazar haya se

gulon pe ek be-KHudi si chhai

chaman mein bahki hui saba se

hai wajd kyun shaKH-e-gul pe tari

lipaT ke jhumi wo kyun hawa se

mahak ki kirnen chaman mein raqsan

gulab ki reshmi qaba se

kali ko chuma gulon ko nocha

kisi ne simab si ada se

hai to masiha to kar mudawa

hai soch zaKHmi teri jafa se

wahi ada be-niyaziyon ki

to kaam kab tak na lun ana se

yaqin kaise karun main 'bano'

sukun kya de saken dilase