KHamosh kis liye baiThe ho chashm-e-tar kyun ho

ḳhamosh kis liye baiThe ho chashm-e-tar kyuuñ ho

koī ḳhafā ho kisī se to is qadar kyuuñ ho

nazar kī pyaas bujhā do jo ik nigāh se tum

to har nazāre se rusvā mirī nazar kyuuñ ho

junūñ kī jāda-tarāshī hai bāñkpan merā

ye rahguzār-e-jahāñ apnī rahguzar kyuuñ ho

girā thā jaam na TuuTā thā koī ā.īna

shikast-e-dil kī bhalā aap ko ḳhabar kyuuñ ho

rafīq tā-ba sahar hai sitāra-e-shab-e-ġham

ye bevafā sā ujālā bhī ham-safar kyuuñ ho

kabhī na rūThne vaale bhī ruuTh jaate haiñ

ye baat pyaar meñ hotī to hai magar kyuuñ ho

ġham-e-zamīñ se yahāñ fursat-e-nazāra kise

galī meñ tum bhī chale aao baam par kyuuñ ho

shab-e-firāq hī achchhī koī umiid to hai

baġhair un ke sahar ho to phir sahar kyuuñ ho

vo she'r saada sahī sun ke dil bhar aa.e 'shamīm'

jo pur-ḳhulūs ho lahja to be-asar kyuuñ ho

KHamosh kis liye baiThe ho chashm-e-tar kyun ho

koi KHafa ho kisi se to is qadar kyun ho

nazar ki pyas bujha do jo ek nigah se tum

to har nazare se ruswa meri nazar kyun ho

junun ki jada-tarashi hai bankpan mera

ye rahguzar-e-jahan apni rahguzar kyun ho

gira tha jam na TuTa tha koi aaina

shikast-e-dil ki bhala aap ko KHabar kyun ho

rafiq ta-ba sahar hai sitara-e-shab-e-gham

ye bewafa sa ujala bhi ham-safar kyun ho

kabhi na ruThne wale bhi ruTh jate hain

ye baat pyar mein hoti to hai magar kyun ho

gham-e-zamin se yahan fursat-e-nazara kise

gali mein tum bhi chale aao baam par kyun ho

shab-e-firaq hi achchhi koi umid to hai

baghair un ke sahar ho to phir sahar kyun ho

wo she'r sada sahi sun ke dil bhar aae 'shamim'

jo pur-KHulus ho lahja to be-asar kyun ho