KHamosh lafzon ko teri agar raza mil jae

ḳhamosh lafzoñ ko terī agar razā mil jaa.e

to mere zehn kī fikroñ ko zāviya mil jaa.e

jo sābiroñ kā bayābāñ meñ naqsh-e-pā mil jaa.e

to mere paañv ke chhāloñ ko rahnumā mil jaa.e

agar nazar ko haqīqat kā aa.ina mil jaa.e

taḳhayyulāt-e-ravānī ko silsila mil jaa.e

yatīm lafzoñ kī nazreñ Tikī haiñ sū-e-qalam

varaq ke ḳhema meñ shāyad ke aasrā mil jaa.e

hamāre ḳhuun se paanī nichoḌ do maulā

hameñ bhī pyaas kā thoḌā sā zā.iqa mil jaa.e

maiñ ġham manātā huuñ sarvar kā is liye 'shārib'

ki is bahāne se shāyad mujhe ḳhudā mil jaa.e

KHamosh lafzon ko teri agar raza mil jae

to mere zehn ki fikron ko zawiya mil jae

jo sabiron ka bayaban mein naqsh-e-pa mil jae

to mere panw ke chhaalon ko rahnuma mil jae

agar nazar ko haqiqat ka aaina mil jae

taKHayyulat-e-rawani ko silsila mil jae

yatim lafzon ki nazren Tiki hain su-e-qalam

waraq ke KHema mein shayad ke aasra mil jae

hamare KHun se pani nichoD do maula

hamein bhi pyas ka thoDa sa zaiqa mil jae

main gham manata hun sarwar ka is liye 'shaarib'

ki is bahane se shayad mujhe KHuda mil jae